Mallos de Agüero - Tierra de naide (5c, 145 m, derrigorrez 5b)

“Tierra de naide” bideak, orokorrean, arroka ona du eta oso ongi ekipatua dago. Luze bakoitiak plaka etzanetatik doaz eta bikoitiak pasagunetxo finen bat duten plaka bertikaletatik.

Bidea aurkitzeko erraza da eta hurbilketa motza du. Mallos de Agüero ezagutzeko modu egokia izan daiteke.

Iristeko: Agüero herrira hurbildu. Herrira iritsi baino lehen eskuinera hartu eta kanposantu aldera igotzen den errepidetxoari jarraitu. Etxea bat eta kanposantua atzean utzi ondoren, goiko aldetik herrira iritsi baino 200 metro lehenago, hegaztiei buruzko poste adierazle batzuk dituen toki batera iritsiko gara. Bertan aparkatu. Hainbat kotxerentzat tokia dago.

Hurbiltzeko: Mallos de Agüerori buelta ematen dion bidezidorra hartu (eskuineko norabidean). Bidea eskalatzeko bidetxo batzuk dituzten bi bloke handien albotik pasa eta erreka lehor batek sortzen duen bailaratxo batean sartzen da. Erreka gurutzatu eta eskuin aldera pasatzen gara. Igotzen jarraitu eta bidea bitan banatzen den toki batera iritsiko gara (lekua erraz identifikatzen da eskuineko bidearen alboan harri-bloke handi bat dagoelako). Toki horretan, gure ezkerrean, jaiotzen den bidezidortxo bat hartu behar da. Bide berri hori uhartxo lehor batean sartzen da. Adi egon behar da, uharraren erdi aldera dagoen mugarri bat aurkitu behar da eta. Mugarria dagoen tokian, berriro ere, ezkerrera jo behar da. Erdi ezkutatuta dagoen bidezidortxoa jarraitu eta berehala gara bidearen oinarrian. Harri-bloke handi baten azpian dagoen aterpe naturalean itzala eta gauzak uzteko tokia aurkituko dugu.

L1 (25 m, 7 aseguru, 4a). Esku eta oinentzako euste-leku ugari dituen plaka etzana.

L2 (30 m, 10 aseguru, 5a). Ipurua ikusten den toki aldera, emeki eskuin aldera igotzen den plaka bertikala. Ipurura iristerakoan norabidea aldatu eta ezkerrera jo behar da bilgunea aurkitzeko. Sabaitxo bat dago luzearen hasieran eta bertan dago luzeko pasagune fina. Arroka-zubi txiki baten laguntzaz baliatuz A0 modura egiteko aukera egon legoke.

L3 (30 m, 8 aseguru, 4a). Zatitxo batzuetan arroka soltea duen plaka etzana.

L4 (30 m, 13 aseguru, 5c). Ongi estutu behar den pasagune fin pare bat dituen plaka bertikala. Bilgunearen gainean, eskuinean, ikusten den kubeta hobe da eskuinetik gainditzen saiatzen bagara. Bost eta seigarren aseguruen artean urrunketa txiki bat. Ondoren gertuago daude aseguruak. Bilgunera iristen ari garela plaka zertxobait etzan egiten da.

L5 (30 m, 6 aseguru, 4a). Eskuin aldera zeharkaldi horizontala egin behar da laugarren asegurura iritsi arte. Ondoren zuzen igo ipuru batean egiten den bilgunea aurkitzeko. Azken zati honetan arrokari arreta apur bat jarri behar zaio, zertxobait hautsita dago eta.

Jaitsiera: Lehen kanaletik jaisten zen, baina orain dela urtebete edo rapel lerro bat instalatu dute. "La vía más fácil de Agüero" bidearen azken bileraren ezkerrean dago. Rapel lerroa erabiltzea azkarragoa eta erosoagoa da (ikus irudia). 

Lehen rapelak 30 m pasatxo ditu. 60 metroko soka batekin oso, baina oso justu ibiliko ginateke. 70 metroko soka batekin inongo arazorik. 60 metroko bi sokekin 2 rapeletan lurrean gara. 

R1 eta R3 bertikalki lerrokatutako bi parabolt kate batez lotura, R2 horizontalki kokatutako bi parabolt bakoitza eraztun batekin. R1etik behera begiratuz harri deigarri bat ikusiko dugu. Rapel lerroa harri horretik 5-7 metro eskuinera doa.  R2 erlaitx handi eta eroso batean dago.

Kontuz harriak botatzearekin behean jendea badago.

Materiala: 13-15 zinta + bilgunerako materiala. Friendsak eta fisureroak ez dira beharrezkoak.

Arroka: Kareharria (konglomeratua).

Orientazioa: Eki aldea. Goi-goizetik eguzkia.

Iraupena: 2h.

Nork ekipatua: Luis Royo, Julio Benedé eta Gonzalo Arguedas, ekaina 2010.

Cambiar idioma (Castellano)