Serra de Queralt - Cresta de Mercadal Inferior (4c, 180 m, derrigorrez 4c)

Mercadal Inferior gandorra igotzeko bide semiekipatua. Bilgune batzuk ekipatuta aurkituko ditugu (eskalada-eskolako bideen azken bilguneak direla uste dut), baina beste batzuk guk osa beharko ditugu (zuhaitz/zuhaixketan edota harri blokeetan). Arrokak euste leku ugari ditu, baina oso pitzatua dago eta ez du segurtasun handirik ematen. Arreta jarri behar da eta aztertu zer ukitzen den. Hori ez balitz, gozatzeko bidea izango litzateke.

Luzeetan aurkituko ditugun paraboltak arroka trinkoa dagoen tokietan jarrita daude. Hortik kanpo aseguru finkoak jartzeko aukera gutxi zegoela ulertzen dut. Hala ere arrokak ematen du friendsak edota fisureroak jartzeko aukera.

Gu gandorraren eskuin aldetik sartu ginen (eskalada-eskola dagoen aldetik). Beste iturri batzuk gandorraren ezkerretik sartzen dela diote, baina arroka oso desegina ikusten da. Ezkerretik sartu nahi bagenu, igoera bidezidorra pinudiaren amaiera aldera utzi beharko litzateke.

Luze batzuk batzeko aukera dago, baina bikoteen arteko komunikazioa okertu egiten da. Horrez gain, zinta espres luze nahiko eraman beharko lirateke.

Iristeko eta Hurbiltzeko: Hurrengo sarrerako informazioa ikusi (Serra de Queralt). Font-Negreko aparkalekutik, igoera gogor baten ondoren, 10 minututan bidearen oinarrian gara.

L1 (15 m, 3 aseguru, 4c). Gandorrera igotzeko plaka motz bat. Gandorrera irteterakoan, metro pare bat beherago, harri-bloke handi baten atzean bilgunea antolatzeko parabolt bat aurkituko dugu.

L2 (25 m, 4 aseguru, 4c). Gandorrari jarraitu. Hainbat zatitan arrokarekin arreta izan behar da. Zati horizontalera iristerakoan harri-bloke batean edo, metro batzuk aurrerago, zuhaitz batean bilgunea osatu.

L3 (25 m, 0 aseguru, II). Gandorraren ezkerretik ongi egiten den gandor horizontala. Harri-blokeetan eta zuhaitzetan babesak jartzeko aukera ugari dago. Bilgunea 2 paraboltez osatua dago eta gandorraren eskuin aldean aurkituko dugu (hurrengo zati bertikala hasten den oinarrian). L2 eta L3 luzeak elkartzeko aukera legoke, baina orduan bikotearen arteko komunikazioa oso txarra izango litzateke.

L4 (20 m, 3 aseguru, 4c). Gandor bertikala. Zati horizontalera irteterakoan bilgunea ezpel sendo batean egin daiteke.

L5 (25 m, 2 aseguru, 4c). Zertxobait estutu behar den pasagunetxo bat duen plaka trinkoa hasieran. Gero errazago, baina arrokarekin arreta izan behar da. Gandorraren zati horizontalera irteterakoan 2 paraboltez osatutako bilgunea aurkituko dugu. L4 eta L5 luzeak batzeko aukera dago.

L6 (40 m, 0 aseguru, II). Gandor horizontala. Harri-blokeetan eta zuhaitzetan babesak jartzeko aukerak daude. Noizbehinka ere, zinta espresak jartzeko, eskuineko bideen azken bilguneak aurkituko ditugu. Bilgunea 2 paraboltez osatua. Gandorraren eskuinean dagoen arte handi eta nabari baten alboan aurkitzen da.

L7 (30 m, 0 aseguru, II). Aurrekoa baino errazagoa den gandor horizontala. Bilgunea rapelatzen den tokian egiten da (arroka-zubia zintekin eta maillon batekin).

Jaitsiera: Erlaitz handi bateraino 15 m inguruko rapel motz bat egin behar da. Gero, gandorraren zati bat oinez jaisten da (destrepe txikiren batekin) leporaino iritsi arte. Bertatik eskuinera irteten den bidezidorra hartu eta 5 minututan bidearen oinarrian izango gara (beste 5 minututan kotxean).

Materiala: 6-8 zinta + bilgunerako materiala. Friends eta fisurero joko bana. Zuhaitzetarako eta harri-blokeetarako zintak.

Arroka: Kareharria (oso pitzatua)

Orientazio: Mendebaldea.

Iraupena: 1 h 50 min.

Cambiar idioma (Castellano)