© X. Larretxea. Con la tecnología de Blogger.

2021/09/05

Azken bi luzeak oso ederrak dituen bide motza eta polita. Azken bi luze horiek arroka trinkoz osatutako plakak dira. Azken bi luze horiengatik soilik pena merezi du bidea egitea.

Hurbilketa eta itzulia laburrak eta gainera oso erosoak. Kotxea uzten den tokitik bide hasierara 5 min eskas daude. Itzuliaren lehen zatia bidezidorretik egiten da eta gero zementuzko eskailera batzuetatik. Oso itzuli erosoa, garbia eta azkarra.

Bideak dituen aipatzeko zailtasunak bi dira. Lehena lurretik altxatzea da. Lurretik metro erdira dagoen erlaitz txiki batera igotzeko pasagunetxo arraroa dago bide hasieran. Behin erlaitzean oinak jarrita gelditzen dena ongi egiten da eskuinean dagoen pitzaduran oinak jarriz. Bigarren zailtasuna azken luzearen azken aseguruaren parean dago. Zertxobait estutu behar den pasagune motz bat dago.

Urte osoan eskala daiteke. Hori bai, udaran goiz-goiz edo arratsaldean, oso berandu, eguzkiak indarra galtzen duenean, ibili behar da. Egun euritsuekin lehen luzeko lehen zatia hezea egon daiteke. Bidearen izena bidearen hasieran jarrita dago, itsatsita dagoen uharri batean.

 

Iristeko:  Alfarras herrira hurbildu eta Benabarre aldera egin N-230 jarraituz. Lau kilometro inguru egin ondoren (errepidea zeharkatzen duen hodi erraldoia baino lehen), “embalse de Santa Ana” bezala adierazita dagoen bidegurutzea aurkituko dugu. Hori hartu eta urtegia dagoen tokiraino hurbildu. Zubia zeharkatu ondoren aparkatu.

 

Hurbiltzeko: Zubia zeharkatu. Tunelerako argiak behar direla adierazten duen seinalearen alboan zementuzko eskailera batzuk daude. Horietatik igo eta bideari jarraitu. Bidea makurtuta dauden eskalada bide batzuen azpitik pasatzen da eta zertxobait beranduago arroila txiki batean sartzen da. Sartu eta berehala, gure eskuinean, ikusiko ditugu bidearen lehena aseguruak. Bidearen izena horman itsatsita dagoen uharri batean aurkituko dugu. Kotxetik 5 min inguru dira.

 

L1 (30m, 6 aseguru, 5b). Euste leku onak dituen horma bertikala. Lurretik altxatzeko pasagune arraroa. Behin erlaitz txikira igo ondoren, eskuinean geratzen den pitzaduran oinak jarriz, ongi igotzen da. Hasierako zati hau gainditzean, hasiera batean ematen duena baino euste leku onak agertzen ditu ezkerrean geratzen den pitzadurak. Plaka etzan batekin amaitzen da luzea.

L2 (40 m, 3 aseguru, 3c). Oso etzana den, plaka estua. Tarteko bilgunea gainditu ondoren eskuinera pasa behar da (zeharkaldi horizontala, ia oinez). Zati delikatua da dagoen harri solte ugariarengatik. Zati hori gainditzean erdi oinez igotzen da bilguneraino. Zati hau zuhaixkez zikina dago. Arroka nahiko trinkoa du, baina lurkara. Dauden bi edo hiru zuhaixka sendoenetan zintaren bat jartzeko aukera dago. Luzea zatitu eta bi luzetan egin daiteke.

L3 (30 m, 6 aseguru, 5a). Aurreko horman bi parabolt lerro ikusiko ditugu. Eskuinekoa igo behar da. Hala ere, nahasteko aukerarik ez dago bidearen izena horman itsatsitako uharri batean jarrita baitago.

Luzea hiru plakez osatuta dago. Luxuzko arroka trinkoa da. Lehen plakaren goiko aldean, irteera babesteko, fisu edo friend bat jartzeko aukera dago.

L4 (20 m, 7 aseguru, 5b). Luxuzko arroka duen plaka. Ia plaka osoan zailtasuna 4 c ingurukoa da. Azken aseguru inguruan dago estutu beharreko pasagunea. Bilgunea gandorrean dagoen harri-bloke handi batean egiten da.

 



Jaitsiera: Gandor erraza hormatik irteteko. Beste bide batzuen aseguruak aurkituko ditugu eta horrek progresioa babesten du. Luzera 25 metro ingurukoa izango da eta tarte horretan 3 aseguru aurkituko ditugu. Lepoan dagoen pinuan bilgunea egin daiteke.

Lepoan bidezidor nabari bat jaiotzen da. Bidea jarraitu eta 3 min ingurutan Santa Anako baselizara eramango gaitu. Urtegiko etxe aldera jarraitu eta bertara iritsi baino lehen, ezker aldera jaitsi zementuzko eskailera batzuei jarraituz. Eskailera horiek bidearen oinera eramango gaituzte. Bertatik kotxera itzultzea soilik geratuko da. Lepotik kotxea dagoen tokira 10-15 min behar dira.

 


Materiala: 7 zinta + bilgunerako materiala. Bi edo hiru zinta zuhaixketarako.

Arroka: Kararria.

Orientazioa: Hegoa.

Iraupena: 1h30min.

Nork irekia: Agustí Sanz

 

Cambiar idioma (Castellano)


Categories: , ,


Komentariorik egin nahi baduzu,hau da lekua.

0 comentarios:

Publicar un comentario