© X. Larretxea. Con la tecnología de Blogger.

2012/09/06

GORGES DE LA JONTE - MAZIZO ZENTRALA

Alpeetako bidean mazizo zentralean geldiunetxo bat egiten dugu. Millau herritik gertu Gorges del Tarn eta Gorges de la Jonte bailarak daude. Lekua nahiko turistikoa  izan arren ingurua nahiko lasaia da. Jarduera gehienak errekarekin loturikoak izaten dira (kanoak eta piraguismoa), baina eskalatzen duen jendea ere mugitzen da hemendik.
Agian udara ez da garai onena hona hurbiltzeko (bero asko egin dezake), baina goiz ibiliz edo arratsaldez, eguzkiak indarra galtzen duenean, edota hormen orientazioarekin jolastuz beti aurki daiteke zerbait itzalean.
Bista ikusgarriak bailara aldera.
Le Rozier herritik gertu dagoen herrixka.

Iristeko: Millau herritik Gorges du Tarn aldera jo D907 errepidea jarraituz (panel adierazleak jarraitu) Le Rozier herrira hurbildu.

Hurbiltzeko: Herri  erdigunetik Capluc aldera igo (adierazia). Auzoko errepidetik igo asfaltoa amaitu arte eta kotxea aparkatu. Guztira 4-5 kotxentzako lekua dago. Pistatik oinez igo harrizko bidezidor bat aurkitu arte (kotxetik 5-7 min.). Bide horretatik biztanlerik gabeko herrixka bateraino igo. Bertan bidegurutze bat aurkituko dugu. Eskuinera hartu. Bideak xume-xume gora egiten du. Aurrerago, 25 min. ingurura, beste bigarren bidegurutze batekin egingo dugu topo. Zuriz eta gorriz margotutako bidea utzi eta beherantz, eskuin aldera, jo. Apur bat aurrerago, 2 minutu eskasera, "Petzl eta Roc Trip" letreroarekin adierazitako bidegurutze bat aurkituko dugu. Ezkerrera hartu. Bidezidorrak ez altueratik galtzen A markarekin izendatutako sektore batera iritsi arte (azken bidegurutzetik 10 min.). Apur bat aurrerago bidezidorrak gogor gora jotzen du. Hiru minututan bidearen oinean gara. Guztira kotxetik 45 min. inguru.
 L´Arête sektorea.

Zebulon (4c, 105 m, derrigorrez 4c)
Bidea oso ongi ekipatuta dago. Inguru hauetako biderik errazena da. Kareharriak itsasgarritasun handia du eta zuloz eta euste-lekuz, bai eskuentzat bai oinentzat, beteta egoteagatik bereizten da. Benetan gozagarria. Bistak bailara aldera, ikusgarriak.

L1 (30 m, 7 aseguru, 4c): Plakatik bloke bateraino igo (euste-leku piloak). Ondoren trabesi motz bat egin behar da eskuinera (5 metro inguru) eta sabaitxo bat gainditu. Sabaiko pasagunea errazago igarotzen da lehenik eskuinera joz eta gero berriz ezkerrera bueltatuz. Sabaia gainditzea bideko pasagune gogorrena da. Bilgune erosoa katez loturiko bi kimikoz osatua (alboan, gertu, beste hirugarren kimiko bat).
L2 (25 m, 6 aseguru, 4c): Plaka eta plaka.
L3( 35 m, 7 aseguru, 4c): Aurreko luzearen berdina. Hormatxo bat bilgunera iritsi baino lehenago, baina ongi igarotzen da (euste-leku piloak). Bilgunea terraza handi batean.
L4 (15 m, 3 aseguru, 4c). Espoloitxo bat terraza handi batera iristeko. Bertan dago bilgunea (lotu gabeko bi kimiko). Eskerretik ere jo daiteke. Aukera berri hori apur bat zailagoa da (5a, 3 aseguru).

Jaitsiera: Bidetik rapelatzen.

Materiala: 8 zinta + bilgunetarako materiala. Friend eta fisureroak soberan daude
Arroka: Itsasgarritasun handiko kareharria. Arrokak euste-leku eta zulo pilo ditu, bai oinentzat, bai eskuentzat.
Orientazioa: Hego-mendebaldea.
Iraupena: 1h15min.


Komentariorik egin nahi baduzu,hau da lekua.

2 comentarios:

  1. ikusten dutenez bueltatu zea!!! eskerrak!!! liburua oso ona,ZORIONAK!! SEGI HORRELA!!

    ResponderEliminar
  2. Eskertzen da.
    Egiten joan ahala udaran eginiko eskaladak argitaratuko ditut. Batzuk benetan zoragarriak izan dira.

    ResponderEliminar