© X. Larretxea. Con la tecnología de Blogger.

2012/10/22

Inguruko bide klasikoa. Oso bide polita. Lehenengo zazpi luzeak, zailtasunean nahiko antzekoak direnak, plaka etzan handi batetik zehar doaz. Itsasgarritasunezko pasagune finen bat badute. Zati hau oso ongi ekipatuta dago. Jarraian datozen luzeak bertikalagoak dira, baina arroka eta ekipamendua kalitatezkoak izaten jarraitzen dute.Bidean jende ugari ibiltzen da. Guk egin genuenean, lasai-lasai baziren15 kordada inguru. Goiz ibiltzea komeni da. Hormaren orientazioak bero askokin eskalatzeko aukera ematen du goiz osoan itzala ematen baitio.Kontuan izan behar da plaka etzan handian paraleloak doazen bi bide daudela (gurea eta Speroni izeneko beste bat, hau gurea baino apur bat zailagoa). Bide horiek zazpigarren bilgunean elkartzen dira eta hortik aurrera bide beretik doaz. Beraz, bilgune horretan ataskuak sortzen dira. Pazientzia izan.

Bide honetan ere bilgune batzuk zementatutako uztai handi batetik hornituta aurkituko ditugu.
Azkenaurreko bilgunetik ikusten diren bistak.
 Hurbiltzeko: Burdinazko zubiaren inguruan aparkatu kotxea. Kontuz! inguru honetan kotxea aparkatzeko ordaindu egin behar da. Ez da oso garestia Suitzan gaudela kontuan hartuta (2 euro egun osorako). Erreka bat pasa eta burdinazko zubira eramaten duen bidea igaro ondoren, errepidearen beste aldean, 20 metro ingurura, harriztatutako bidezidor bat jaiotzen dela ohartuko gara. Hortik igotzen da. Poste elektriko baten albotik igaro ondoren bideak horizontalean jarraitzen du harrizko bloke handi batzuen artetik. Erreka bat zeharkatu eta berehala gara bidearen hasieran (20 min inguru kotxetik). Izena pinturarekin horman margotua.

L1 (25 m, 6 aseguru, 5a). Plaka nahiko bertikala pasagune finen batekin. Azken zatian hormatxo bat.
L2 (35 m, 9 aseguru, 4c). Itsasgarritasun pasaguneren bat duen plaka etzana.
L3 (30 m, 10 aseguru, 4c). Aurrekoaren antzekoa.
L4 (30 m, 8 aseguru, 4c). Aurrekoaren antzekoa.
L5 (35 m, 10 aseguru, 4c). Aurrekoaren antzekoa.
L6 (35 m, 10 aseguru, 4c). Aurrekoaren antzekoa.
L7 (45 m, 7 aseguru, 4c). Aurrekoaren antzekoa, baina plaka nahiko etzanarazten da eta aseguruak urrunago daude. Aukera handiak kordada ataskua gertatzeko. Bi metro gorago beste bilgune bat dago.
L8 (25 m, 8 aseguru, 5a+). Sabairaino euste-leku oneko horma bertikala. Sabaia bere eskuinetik ekiditen da. Gero, bilguneraino, plaka bat. Apur bat gorago igotzen bagara (15 m inguru, bloke belartsu eta lurtsuak) erlaitz belartsu handi batean, zuhaitz handi batean, bilgunea egiteko aukera izango dugu.
L9 (25 m, 7 aseguru, 5a). Euste-leku oneko horma bertikala. Bilgunea aurkitzerakoan aurrera jarraitzen badugu, berehala, 15 metro ingurura, beste bilgune eroso bat aurkituko dugu (2 parabolt katez lotuak; rapelatzeko?). Guk ez genuen horrela egin, ez genuelako ezagutzen, baina uste dut horrela hobeto dela hurrengo luzean (bideko luze giltza) bikotea hobeto kontrola dezakezulako.
L10 (35 m, 8 aseguru, 6a). Horma bertikala. Pasagune gogorrean hiru aseguruak oso gertu daude. Arazorik gabe A0 modura egiteko aukera dago. Bilgunea erlaitz batean.
L11 (30 m, 7 aseguru, 5b). Bilgunetik irten eta espoloitik igo (euste-leku onak). Bilgunera iristeko hormatxo bat.
L12 (30 m, 5 aseguru, 4a). Bilgunetik irten eta espoloitxotik igo (etzana). Hori gainditzerakoan bilgunea aurkitzeko eskuin aldera zeharkaldia egin. Bilgunea parabolt batez soilik hornitua.

Jaitsiera: Azken bilgunetik bidezidor bat jaiotzen da. Hasieran gora egiten du. Bidezidorretik igotzen hasi eta nahiko igo dugula ohartzerakoan (150-200 metro igo ondoren) gure eskuinean geratzen den espoloi zabalera pasa behar da. Leku erosoen eta errazenetik horizontalki zeharkatu. Zeharkatzen ari garenean, behean, gure eskuinean, egurrezko txabola bat ikusiko dugu. Horra hurbildu behar gara.
Txabolaren alboan beste txabola batera eramango gaituen bidezidor bat jaiotzen da. Jaisten jarraitzen dugu eta ate metaliko bat  duen babes natural baten albotik igaroko gara. Aurrerago beste txabola bat. Jarraitu jaisten, jada markatuagoa den bide batetik, eta Ponte Brolla jartzen duen gezi hori batekin egingo dugu topo. Bideak erreka baten ezkerreko aldetik jaisten jarraitzen du. Ordu erdiko jaitsiera gogor batek errepidean utziko gaitu. Ia behean gaudenean, 10 minutu eskas geratzen direnean, bunker bat dirudien eraikin baten albotik igaroko gara. Azken bilgunetik errepideraino, guztira, 45 minutu inguru.

Materiala: 10 zinta + bilgunerako materiala. Friendsak eta fisureroak soberan.
Arroka: Gneis.
Orientazioa: Mendebaldea.
Iraupena: 4h45min.
Nork ekipatua: Häns Müller



Categories: , ,


Komentariorik egin nahi baduzu,hau da lekua.

0 comentarios:

Publicar un comentario