© X. Larretxea. Con la tecnología de Blogger.

2012/12/31

SUIZA - ZERMAT
Suitzara itzultzen gara. Oraingo honetan Zermattera. Gronergrat gailur panoramikorako bidean Riffelhorn dago. Bere bi isuri aldetan eskalada bideak dituen harrizko gailur txiki bat da. Gehien egiten direnak hego isurikoak dira. Gehienak ez dute 5c-ko zailtasun-maila gainditzen, baina semiekipaturik daude. Aseguruak  nahiko urruti daude eta auto babesteko materiala eramatea komeni da. Cervino, Breithor eta Monte Rosa eta bere ikaragarrizko glaziarrera dauden bistak, ikusgarriak. Bista horietaz gozatzeko soilik pena merezi du bide hauetako batzuei bisitatxo bat egitea. Lasaitasuna ziurtatuta dago.
Egg bidearen R0tik ikusten den paisaia.

Iristeko: Zermattera hurbildu.

Hurbiltzeko: Gronergratera igotzen den trena hartu. Rotenboden geltokian jaitsi behar da (igotzea 35 franko; igo eta jaitsi 70). Bidaia merkeago egiteko beste aukera bat Riffelberg geltokian jaistea da (igotzea 29 franko; igo eta jaitsi 58) eta hemendik, ordu erdi eskasean, oinez Riffelhornera igotzea da.
Trenean igotzea garestia suertatzen da, baina desnibel handia kentzen dizu. Bidaia merkeago egin daiteke, guk egin genuen bezala, oinez jaitsiz. Zermatt herriraino 2h 1/2ko jaitsiera dago.
Rodenboden geltokiaren aurrean Riffelhorn dago. 
Riffelhorn mendiaren ipar isuria.
Lepora jaitsi eta muinoa apur bat igo ondoren hego aldera pasa behar da. "Routen Riffel sud" adierazten duen karteltxo urdin bat ikusiko dugu. Bideetara hurbiltzeko bidezidorraren hasiera adierazten duen karteltxoa da (Rodenboden geltokitik 10 min.) 
Bideetara hurbiltzeko bidezidorraren hasiera adierazten duen karteltxoa.
Bidezidorra jarraitu behar da. Tarte batzuetan apur bat "aereoa" da, baina ez du inolako zailtasunik. Harkaitzean aurkituko ditugun pintura urdin markak eta karteltxo urdintxo batzuk jarraituz bidea erraz jarraitzen da. Egin nahi dugun bidearen arabera belarrezko kanal bat edo bi gurutzatu beharko ditugu (ikus hurbiltzeko eskema). Via Charly bidearen hasieraraino 10 minutu inguru daude eta Egg bideraino 25 min. inguru.
Hurbilketaren eskema.

 Egg (4b, 225 m, derrigorrez 4a)
Mota askotako eskalada eskaintzen duen bidea. Kalitatezko gneisa, euste-leku eta erregletaz beteta. Hasiera batean arrokak labainkorra dirudi, baina guztiz kontrakoa da, itsasgarritasun oso oneko arroka da. Aseguruak urrun. Friends eta fisurero joko bana eta zintak eraman. Zinta espres luzeak ongi datoz. Bilguneak katez elkartutako bi paraboltez osatuak.

L1 (30 m, 5 aseguru, 4b). Zati horizontal txiki batez banandutako bi plaka. Bigarrena lehenengoa baino bertikalagoa da.
L2 (45 m, 3 aseguru, 3b). Kanal-diedroa. Lehenengo 2 aseguruak ongi ikusten dira,baina hirugarrena ez. Horretarako azken asegurutik 5 metro inguru igo eta ezkerrera pasa eta kanal-diedro moduko batetik igo.
L3 (30 m 3 aseguru, 4a). Hasieran 15 metro inguru oinez plaka handi baten oinarrira iristeko. Plaka hori ezkerretik eskuinera igotzen da beste plaka bertikalago bat saihestuz.
L4 (35 m, 3 aseguru, 3c). Plaka etzan handi bat hasieran. Gero espoloitxo bat, apur bat bertikalagoa, bloke handiekin. Lehenengo asegurua urrun. Blokeak dauden tokirako ongi datoz zinta luze batzuk.
L5 (30 m, 2 aseguru, 4b). Blokedun zati bat  hasieran eta plaka txiki polit bat amaieran. Plaka igarotzeko bere ezkerreko ertzetik jo.
L6 (35 m, 6 aseguru, 4a). Eskuineko plakatxora irten, gero ezkerreko kanaltxora pasa. Hori gainditzerakoan ezkerreko espoloiera pasa eta plaka handiaren ezkerrean geratzen den ertzetik igo.

Azken bilgunetik 25 metroko trepadatxo bat besterik ez da geratzen gailurreko gurutzera iristeko.

Jaitsiera: Krestatik oinez gehi bi rapel motz.

Materiala: 6-8 zinta + bilgunerako materiala. Friends eta fisurero joko bana eta zinta luzeak. Ongi datoz zinta espres luzeak.
Arroka: Gneis.
Orientazioa: Hegoa.
Iraupena: 2h30min.
Martin Lehner eta Andreas Perren, 2000.

Categories: , ,


Komentariorik egin nahi baduzu,hau da lekua.

0 comentarios:

Publicar un comentario