Larreñigiko haitzak (Egino) - Txomin (6a+, 240 m, derrigorrez 5c)

31-12-2015ean eguneratua.
Semiekipatutako bide hau Eginoko beste klasiko handi bat bihurtzen ari da. Susi eta Elmer bideen artean kokatuta dago. Arroka orokorrean ona da, baina zati batzuetan adi ibili behar da. Giltza den luzea, bostgarrena da. Bi aseguru ditu soilik eta oso urruti gainera. Lehen, bien artean iltze bat zegoen, baina orain ez dago sokakide batzuk kilikolo aurkitu eta kendu egin zutelako.

Bidearen hasiera aurkitzeko (agian gauza zailena) mihi forma duen plaka etzan bat bilatu behar da. Plaka hori bi haritzen artean dago, harkaitzak egiten duen moko berezi baten ezkerrera. Bidea Susi bidea hasten den lekutik 20-25 metro eskuinera kokatuta dago. Lehenengo parabolta oso goian ikusten da.l

Iristeko: Egino herrira hurbildu.

Hurbiltzeko: Ikus aipamena.

L1 (50 m, 8 aseguru, 5c). Lehenengo metroak plaka etzan batetik egiten dira, baina lehenengo asegurua urrun dago, 15 metro ingurura, plakan dauden belar batzuen gainean. Lehenengo parabolt hori baino lehen, plakan dauden belar horiek baino lehenago, trabatutako fisurero bat dago. Bigarren asegurua zuhaixka baten alboan dago. Lehenengo eta bigarren aseguruen artean estutu beharreko pasagunea dago. Gero diedrotxo bat eta sabaitxo bat igaro behar dira. Azken hau gainditu ondoren diagonalean ezker aldera igo behar da bilgune aurkitzeko. Zailtasun jarraia duen luzea da.

L2 (40 m, 3 aseguru, 4c). Ezker aldera, espoloi aldera, irten.  Lehenengo asegurua 10 metro ingurura, enbor baten alboan. Espoloitik igo eta zinta handi bat oso ongi koka daitekeen harri-moko bat aurkituko dugu. Apur bat gorago, zuhaitz baten parean, ezkerrera pasa eta erdian pitzadura bat duen diedro batetik igo behar da. Bertan friendsak oso ongi sartzen dira. Espoloira berriro irten eta plakatxo bat gainditu behar da bilgunera iristeko. Arroka ona luze osoan lehenengo metroak izan ezik. Tarte horretan arroka ezin da esan txarra denik, baina arreta pixka bat jarri behar da.

L3 (35 m 3 aseguru, 4c). Plakatik irten eta diedro-kanal moduko batean sartu. Bertan friendsak ongi koka daitezke. Espoloiaren gailurraren oinarrian aseguru bat dago. Txapatu eta eskuinera pasa azken metroak egiteko. Hemen arrokarekin arreta pixka bat eduki behar da.l

Apur bat igo eta 30 metro inguru jaitsi (destrepe txiki bat) eskuineko lerroari jarraitzeko.

L4 (40 m, 6 aseguru, 5b). Zailtasun jarraia duen luzea. Zuhaitza gainditu ondoren, pitzatutako plaka handi batetik igo behar da.

Bilgunetik irten eta 100 metro inguru egin behar dira hurrengo luzearen hasierara iristeko. Hasiera aurkitzeko bloke handi baten gainean harrizko mugarri bat bilatu behar dugu.

L5 (45 m, 2 aseguru, 6a+ edo 5c/A0). Lehenengo asegurua (plaka bertikal batean) oso urrun ikusten da, baina nahiko ongi iristen da. Plaka hasi baino lehen friends batzuk ipintzeko aukera dago. Txapatu ondoren 6a+ko pasagunea A0 modura pasa daiteke. Euste-lekuak dituen pitzadura batetik jarraitu behar da, baina erdialdera utzi eta apur bat eskuinera egin behar da. Sabaitxo batera iritsiko gara. Lehen iltze batekin babestua zegoen, baina orain kenduta dago. Ematen duenez sokakide batzuk kilikolo aurkitu zuten eta arazoak ekiditzeko kentzea erabaki zuten. Bertan dagoen pitzaduran friend txiki bat ipini daiteke. Bere gainean estutu behar den beste pasagune bat dago. Luzeak bilguneraino plaka bertikal batetik jarraitzen du, baina oraingo honetan euste-leku gehiagorekin.

L6 (30 m, 5 aseguru, 3c). Amaieran hormatxo bat duen espoloitxo etzan bat.

Jaitsiera: Azken bilgunetik, bide egokienetik, goraino igo (mugarri batzuk badira). Goian ezkerraldera jo eta Azoreko bide arruntetik oinez jaitsi. Lurra bustiarekin kontuz ibiltzeko jaitsiera da. Kotxeraino guztira 50-60 min inguru.

Materiala: 8-10 zinta + bilgunerako materiala. Friends eta fisurero joko bana eta zinta luzeak.

Arroka: Kareharria.

Orientazioa: Hegoa.

Iraupena: 4h15min.

Lasarte anaiak, 2001.

Cambiar idioma (Castellano)