Queyras - Microcalcifications (5c, 180 m, derrigorrez 5b)

Queyras aldera itzultzen gara. Oraingoan paraje eder batean dagoen bide motz bat egitera. Lehenengo luzeko zatitxo batzuk izan ezik, arroka ona du. Paisai polita eta toki lasaia. R1 eta R3 bilgunetatik, belarrezko erlaitz zabal batzuetatik, alde egiteko aukera egon daiteke.

Paraje ederra.

Iristeko: Briançon hiriaren hego aldean, Lac de Serre-Ponçon lakuaren goi-ibarrean Embrun herria dago. Briançon aldera kilometro batzuk aurrerago, Guillestre herrira daraman bidegurutzea dago. Bertatik Château de Queyras herrira daraman D902 errepidea hartu. Herri horretara iritsi baino lehen (1,5 km) L´Izoard mendatera doan errepidea hartu. Igotzen hasi eta berehala, kilometro bat  igaro baino lehen, aurkituko dugun bidegurutzean ezkerrera egin eta Villargaudin herrira igo (D802). Herria zeharkatu eta amaiera aldera Queyron jartzen duen kartela ikusiko dugu. Asfaltatutako pistatik igotzen jarraitu. Kilometro bat aurrerago harri-txintxarrizko pista bihurtzen da. Pista amaitu arte kalitate onekoa da eta kotxeek bertatik ibiltzeko ez dute inongo arazorik. Harri-txintxarra hasi eta handik 500 metro ingurura bidegurutze batekin egingo dugu topo. Ezkerreko pista hartu (adierazia). Pista beste 2,5 kilometrotan jarraitu eta Queyron izeneko eremura iritsiko gara. Iturria, zelai handi bat, bi aparkaleku handi eta hamaiketakoak egiteko mahaiak dituen eremua da. Jende asko igotzen da hona eguna pasatzera.

Hurbiltzeko: Zelai dagoen tokitik gora jotzen duen lurrezko pista bat jaiotzen da. Hori hartu eta gora emeki eginez granja-txabola batera hurbilduko gaitu (bergerie de Baoude). Txabolara iritsi baino ehun bat metro lehenago behetik (ezkerretik) inguratzea komeni da. Horrela txabola inguruan ardiak zaintzen solte egon daitezkeen zakurrak (mastinak) ekidituko ditugu. Zelaietatik zehar Balari lepora igo. Bertara iristerakoan (kotxetik 45 minutu inguru), aldapa gogor batetik beste aldera jaitsi eta pinu handi batzuk dauden toki aldera jo. Hortik eskuinera egin eta, lehenengo kontrahorma gainditu ondoren, kanal batetik igo lehenengo asegurua aurkitu arte. Kanala aurkitzen laguntzeko, kontuan izan pinu argal bat duela bere goi-partean eta ia amaieran hildako enbor bat. Kotxetik guztira 50 minutu inguru.

L1 (50 m, 6 aseguru, 4c). Belarrezko erlaitzez banatutako plaka etzanak. Zatitxoren batean arrokarekin arreta pixka bat izan behar da. Hasiera erraza. Luzearen erdi aldera dago zatirik zailena. Bilgunera iristeko azkeneko 15 metroak begetazioz jantzia dagoen aldapa etzan batetik egiten dira. Erraza da, baina asegururik gabe. Bilgunea belarrezko erlaitz zabal batean dago.

L2 (25 m, 6 aseguru, 5c). Itsasgarritasun handiko arroka trinkoz osatutako plaka. Bilgunetik irten eta pitzatutako plaka bertikal bat gainditu. Ondoren, eskuinetik ezkerrera igoz, organo-tubo moduko egiturez osatutako plaka zeharkatu behar da. Euste-leku onak eta itsasgarritasun handia ditu. Hala ere, zati honetan aseguruen artean nahiko urrutiratze handia dago. Azken zailtasuna bilgunera iristeko gainditu behar den pasagune horizontal labur bat da. Pasagune fina eta teknikoa, baina ongi babesturikoa.

L3 (25 m, 4 aseguru, 4c). Bilgunetik irten eta bi hormatxo gainditu behar dira pinu bat duen terraza belartsu batera  iristeko. Arroka trinkoz osaturiko plakatxo batek jarraitzen du. Hori gainditu ondoren beste terraza batera iritsiko gara. Terrazatik hurrengo plaka bertikalaren oinera iritsi arte  jarraitu.

L4 (25 m, 5 aseguru, 5a). Euste-leku oneko plaka bertikal trinkoa. Eskuinera pasatzeko pasagune fina hirugarren aseguruan. Ongi babestua.

L5 (25 m, 3 aseguru, 4a). Euste-leku oneko plaka eta ondoren kresta. Arroka ona, baina ez aurreko luzekoa bezain ona. Bilgunea gailurrera doan kresta zabalean.

L6 (30 m, 1 aseguru, II). Gailurrera igotzeko zatia. Erraza. Kresta zabal batetik doa. Azken luze hau sokatik askatuta egin daiteke. Ez dago R6 bilgunetik, ez eta egiteko aukerarik. Gailurra belarrezkoa da eta ez dago bilgunea osatzeko ezer.

Jaitsiera: Krestari jarraitu. Amaiera aldera, kresta jaisten hasten denean, apur bat eskuinera, rapel instalazioa ikusiko dugu (parabolt bakarra mailonarekin). 15 metro inguruko rapel labur batek kanal batean uzten gaitu. Kanalaren lepotxora igo eta, oinez, gure eskuin aldera geratzen den kresta jarraitu. Belarrezko lepotxo batera iritsiko gara. Bertatik, arazorik gabe, granja aldera jaisten da.

Materiala: 7-9 zinta + bilgunerako material. Ongi etor daiteke friends eta fisurero joko bana.

Arroka: Kareharria.

Iraupena: 1h45min.

Nork irekia: S. Pusnel eta J.P. Cherbonnier, 2012.

Cambiar idioma (Castellano)