© X. Larretxea. Con la tecnología de Blogger.

2014/12/14

Paret de la Formiguerako klasikoenetik klasikoena. Arroka ona eta, nahiz eta spiten bidez izan, ongi ekipatutakoa. Lehenengo luzea apurtxo bat bertikala hasieran (gero etzanagoa), baina hortik aurrera gero eta bertikalagoa jartzen joaten da. Hirugarren luzea nahiko mantendua.
Krokisean Garrets-Eusebi bidearen zati bat azaltzen dut ohikoa izaten delako jendea nahigabe nahasi eta bertan sartzea. Garrets-Eusebi bideko R1 bilgunetik posible da arazorik gabe Martinetti bidera pasatzea. Horretarako nahiko da eskuinera emeki gorakorra den zeharkalditxo bat egitea.

Hurbiltzeko: Kotxea P1 aparkalekuan utzi eta ipar aldera doan bidezidorra hartu (ikus krokisa). “Ferrata”  adierazten duen bigarren kartelean errekatxoa gurutzatu eta bide nabari bati jarraituz trenbidera igo (10 min). Trenbidea gurutzatu eta beste aldean dagoen bidetik igoz beste 5 minututan hormaren oinarrian gara.

L1 (15 m, 3 aseguru, 4b).  Hasieran apurtxo bat bertikala den plaka. Gero bilgunera iritsi arte etzaten joaten da.
L2 (15 m, 3 aseguru, 4c). Zuzen igo. Bilgunea iritsi baino lehenago luzeko pasagunetxo gogorra dagoen hormatxo bat aurkituko dugu. L1 eta L2 batzeko aukera dago.
L3 (25 m, 7 aseguru, 5b). Zailtasunean oso  mantenua den plaka bertikala. Hala ere beti aurkituko ditugu oinentzako eta eskuentzako euste-lekutxo eta erregeletatxoak. Bidean aurkitzen diren aseguruekin alderatuta luze honetako lehen asegurua nahiko urruti (4-5 m)  dago. Hori txapatu ondoren, lasaitu ederra hartzen da. Seigarren aseguruan ezkerrera 5 metro inguruko zeharkaldi horizontala egin behar da bilgunera iristeko. Zeharkaldia nahiko erraz ateratzen da. Bilgunea erlaitz handi batean egiten da.
L4 (25 m, 6 aseguru, 5c). Bigarren luzekoak baino gogorragoak diren pasagune batzuk ditu luze honek, baina ez da aurrekoa bezain mantendua. Eskuinera emeki eginez igotzen da hasieran. Ondoren zuzen eta gero, berriro ere, eskuinera.




Jaitsiera: Inguruko beste bideren bat egin behar badugu, onena rapelatzea da (igo garen bidetik, Garrets-Eusebi bidetik edo Normal izeneko bidetik). Ez badugu beste biderik egin behar, hobe da oinez jaistea. Azkarragoa, erosoagoa eta errazagoa da. Horretarako azken bilgunea baino apurtxo bat gorago jaiotzen den bidezidorrari jarraitu behar zaio. Bide eroso batetik jaitsiz 10 minututan trenbidean gara eta beste 10 minutu baino lehenago kotxean.

Materiala: 7 zinta + bilgunerako materiala. Friendsak eta fisureroak ez dira beharrezkoak, soberan daude.
Arroka: Kareharria (tillita).
Orientazioa: Hegoa.
Iraupena: 1h30min.
1. igoera:.M.A. Blasco, J. Godoy, J. Martinez, J. Mayor eta J. Villaroya, 1973.

Categories: , ,


Komentariorik egin nahi baduzu,hau da lekua.

0 comentarios:

Publicar un comentario