Montserrat - Pitu Serrano i Nuria Coma (6a+ edo 5a/A0, 160 m, derrigorrez 5a) ~ Eskalatzen

2015/04/24

Montserrat - Pitu Serrano i Nuria Coma (6a+ edo 5a/A0, 160 m, derrigorrez 5a)

Egilea X Larretxea Ordua 20:32 Komentariorik ez

Bide polita, arroka onarekin eta oso ongi ekipatua. Bi zatitan bananduta egoterakoan zatitan egiteko aukera dago. Bi zatietako edozein egin dezakegu (goikoa ala behekoa) eta zati bertikalak nola gainditzen ditugun ikusita beste zatia egitea ala ez erabaki. Hala ere behetik egitea aholkatzen dut. Sentsazio hobeagoarekin amaitzen duzu. Guztiz gomendagarria den bidea da.

Iristeko: Hurrengo sarrera kontsultatu (Montserrat).

Hurbiltzeko: Teleferikoaren goiko geltokitik Sant Joan kaperara doan pista jarraitu. Kapera aurretik igaro eta Sant Joan eta Sant Onofre baselizen hondakinetara doan aldapa eskuinean utzi (10 min.). Justu gure ezkerrean marka urdinez adierazita dagoen bidezidorra jaiotzen da. Behe aldera egiten du. Bidetik jaitsi enborrez eginiko oztopo bat aurkitu arte. Marka urdinak dituen bidea jarraitu (eskuinekoa) eta lepora igo. Beste aldera jaitsi eta markak jarraitu. “La Torna” bidearen oinarritik pasa ondoren bideak berriro behera egiten du (ezkerrera). Nahiko jaitsi behar da. Bideak ematen du ezkerrera asko jotzen duela eta gure helburutik aldentzen dela, baina horrelako batean bideak bihurgune handi batean norabidez aldatzen du (ezkerrera jotzen du). Bertan bidexka bat jaiotzen da. Bidezidorra jarraitu eta hormaren oinarrira iritsiko gara. Horma inguratu eta berehala aurkituko dugu bidearen hasiera.

Inguruko mapa eskematikoa kontsultatzeko begiratu hurrengo sarrera: Montserrat II.

L1 (45 m, 12 aseguru, 4c). Hasieran metro batzuk zuzen igo behar da, baina gero ezkerrera, lurretik gertu, goranzko zeharkaldia egin behar da bilgunearen azpian kokatu arte. Ondoren zuzen igo bilguneraino. Zeharkaldiak oinez fidatu behar den pasagune finen bat du.

L2 (30 m, 14 aseguru, 6a+ edo 5a/A0). Gilborrera iritsi arte, plaka. Gilborra modu librean (6a+) edo A0 modura gaindi daiteke. Zati hori igarotzerakoan, beste zati bertikal bat geratzen da, baina euste leku onak eta aseguruak gertu ditu.

L3 (20 m, 3 aseguru, 3b). Gailurretik metro batzuk beherago uzten gaituen plaka etzana.

L4 (35 m, 11 aseguru, 4c). Plakatik zuzen igo eta laugarren aseguruan, ezkerrera, zeharkaldi motz bat egin. Ondoren zuzen igo bilguneraino. Bilgunea baino metro batzuk beherago pinta txarra daukan lauza handi bat dago. Ezkerretik ingura daiteke (2 aseguru) edo zuzen igo (adi arrokarekin).

L5 (30 m, 14 aseguru, 6a edo 5a/A0). Horma bertikalaren azpian jartzeko, ezkerrera, metro bateko zeharkalditxo bat egin behar da. Horma bertikala A0 modura egin daiteke. Ondoren hain bertikala ez den beste zati bat, euste leku onekin. Azkeneko 15 metroak erraz igotzen dira plaka etzan batetik zehar.