Aiztondo - San Miguel de Aralar (6a, 110 m, derrigorrez 5c) ~ Eskalatzen

2016/02/27

Aiztondo - San Miguel de Aralar (6a, 110 m, derrigorrez 5c)

Egilea X Larretxea Ordua 18:46 Komentariorik ez

Urtarrileko azken egunetako eguraldi onak aprobetxatuz Aiztondora hurbildu gara San Miguel de Aralar izeneko bidea egitera. Horma honetako beste bide gehienen antzera arroka trinkoz osatutako plaketan eskalatzen da. Lehenengo luzean plakak nahiko etzanak dira, baina hortik Aurrera bertikalak dira. Plaka ez den horretan aipatu beharra dago azken luzeko desplomatuan eskuinetik ezkerrera egiten den zeharkaldia da. Arroka begetaziorik gabe, trinkoa eta kalitatezkoa.

Bidea oso ongi ekipatua dago. Urte osoan eskala daiteke. Jaitsiera bidetik rapelatzen egiten da, bilgune guztiak eraztunekin hornituta rapelatu ahal izateko.

Iristeko eta hurbiltzeko: Ikus hurrengo sarrera.

L1 (30 m, 10 aseguru, 4b): Bi plakatxo etzanak pitzadura bertikal baten oinarrian uzten gaituzte. Pitzadura hobeto gainditzen da bere ezkerretik. Luzea “Clásica sur” bidearekin partekatzen da.

L2 (30 m, 8 aseguru, 5b): Pitzaduraren azpian jarrai arte zati erraza. Zuzen ekin eta posible dela ikusten dugunean ezkerrera pasa eta diagonalean ezker aldera igotzen den pitzaduraren laguntzarekin igo. Pitzadura gainditu ondoren plaka handi batera irtengo gara. Plaka hasieran txapen ezkerretik igotzen da eta gero eskuinetik. Bilgunea iristeko pasagune fin bat dago.

L3 (25 m, 8 aseguru, 5c): Lehenengo aseguruaren azpian jarri arte, zeharkaldi horizontal motz bat eginez ezker aldera irten. Oinetan fidatu beharra dago, baina hasieran dirudiena baino errazagoa da. Aurrez aurre itsasgarritasunezko bi pasagune fin dituen plaka luzea dugu. Lehenengo pasagunea lehenengo eta bigarren aseguruen artean dago. Bigarrena bosgarren eta seigarren aseguruen artean. Euste leku onera iristeko pasagune zertxobait luzea egin behar da. Hemendik aurrera aseguruen arteko distantzia zertxobait handitu egiten da. Azken metroetan oinentzat pitzadura bat dago. Bilgunera iristeko ezker aldera zeharkaldia egiten laguntzen du. Bilgunea zertxobait deserosoa.

L4 (20 m, 7 aseguru, 6a): Euste leku onak dituen diedro oker baten laguntzaz bilgunetik irten eta igotzen hasi. Lehenengo asegurua zertxobait urruti (5 m ingurura). Ezker aldera jo eta horman zintzilik dagoen harri handia gainetik pasa ondoren sabaiari ekin. Bertan, ezker aldera, zeharkaldi motz bat egin behar da. Desplomea gainditu ondoren, bilgunera iritsi arte, euste lekuak dituen plaka bertikaletik igotzen da.