Eskalatzeko toki polita. Hurbilketa laburra eta
erosoa, arroka ona eta ekipamendua luxuzkoak dira. Eragozpen bat bilatzekotan,
tokia jendetsua dela izan daiteke. Hala ere, ohikoena jende gehiena lehenengo
luzeetan geratzea izaten da eta bigarren luzetik aurrera lasaiago eskalatzen
da. Goiz hurbiltzen bagara jendea kenduko dugu eta itzal tartea luzatuko dugu,
eguerditik aurrera eguzkiak bete betean ematen baitio hormari.
Bilgune gehienak katez loturiko bi kimikoz osatuta
daude. Badira beste batzuk iltze oso handi eta kimiko batez ere osatutakoak,
hauek ere katez lotuta. Denak beraz rapelatzeko prestatuta daude. Jendearen
kopuruaren arabera rapelatuz edota oinez jaitsi daiteke. Oinez jaisteko goiko
kateari jarraitu behar zaio (ezker aldera) eta eskailera eta baranda metalikoz
ekipatutako bide bertikal batetik jaitsi behar da.
“Kanpamentu base” delako on bat Bueteko kanpina izan
daiteke. Chamonix inguruko kanpin guztiak beteta daudenean, hemen lekua egoten
da. Leku lasaia da eta martxa gehiago nahi badugu kotxez 15 minututan Chamonix
hiri erdian gaude.
Iristeko:
Chamonix herritik Suitza aldera egin behar da D1506
errepideari jarraituz. Col des Motets igo eta Vallorcine aldera jaitsi behar
da. Le Buet (Comune de Vallorcine) auzora (?) sartzerakoan gure ezkerrean aparkaleku
handi bat ikusiko dugu. Tren geltokiarena da. Tren geltokira joango bagina
bezala sartu behar gara, baina hori egiterakoan berehala ikusiko dugu kanpina
adierazten duen kartela (“Des Motets”). Trenbidearekiko paraleloa doan
asfaltatutako pista jarraitu eta egoki ikusten dugunean aparkatu. Kanpinean
sartu baino lehen, bidearen ertzean, kotxea uzteko hainbat toki daude.
 |
| Eskema. |
Hurbiltzeko:
Kanpin aldera jaitsi eta “Rocher d´escalade”
adierazten duen kartela ikusiko dugu (ikus beheko argazkia). Bidea trenbide azpitik pasatzen eta
kanpinaren atzeko zatitik ere (iturria dago bertan). Zertxobait aurrerago pista
utzi eta bidezidor batetik igo behar da (poste adierazlea). Hormaren oinarrira
15 minututan iristen da.
“Pilier de Vallorcine” biderako hormaren oinarria
eskuin aldera jarraitu behar da eta bidetxo batetik terraza bateraino igo.
Kimikoen bi lerro ikusiko ditugu. Gurea ezkerrekoa da.
Pilier
de Vallorcine (4c, 95 m, derrigorrez 4b)
L1
(20 m, 10 aseguru, 4b). Pasagunetxo bat sarreran. Gero euste lekuak
dituen plaka.
L2
(30 m, 14 aseguru, 4c). Plaka ezproitik. Oinetan fidatu behar den
itsasgarritasunezko pasagunetxoa laugarren eta bosgarren aseguruen artean
(aseguruak gertu, ½ m-tara).
L3
(20 m, 8 aseguru, 4b). Hormatxo bat
hasieran. Gero ezproitik plaka.
L4
(25 m, 9 aseguru, 4b). Aurrekoak baino
zertxobait bertikalagoa den itsasgarritasunezko plakatxoa hasieran. Ondoren,
bilgunera iritsi arte, harmailak eta amaieran plakatxo bat.
Materiala: 14 zinta + bilgunerako
materiala. Friends eta fisureroak soberan daude.
Arroka: Gneis
Orientazioa:
Mendebaldea.
Itzala goizez.
Iraupena: 1h15min.
Courage
dülfons! (5b, 95 m, derrigorrez 4c)
L1
(25 m, 9 aseguru, 4c). Lehenengo zatian pasagunetxoren bat duen
plaka bertikala. Bilgune bat aurkituko dugu. Jarraitu aurrera eta harmailetatik
hurrengoraino jarraitu. Pinu handiren eskuin aldean aurkituko dugun bigarrena
da.
L2
(30 m, 10 aseguru, 3c). Tarteko bilgunera iristeko plaka pare bat
gainditu. Hurrengo bilguneraino kanal etzanetik jarraitu (tarteko bilgunetik ez
da ikusten azken hau).
L3
(25 m, 8 aseguru, 5b). Plaka zeiharra
hasieran. Ondoren babaresa luze bat. Erdi aldera estutu behar den zatitxo bat
du. Agerikoa ikusten dugunean zuzen irten (erraza, euste lekuekin).
L4
(15 m, 5 aseguru, 4b). Hormatxoa hasiera.
Ondoren, bilguneraino iritsi arte, harmailak. Azken 6 metroak errazak, baino
asegururik gabe.
Materiala: 10 zinta + bilgunerako
materiala. Friends eta fisureroak soberan daude.
Arroka: Gneis
Orientazioa:
Mendebaldea.
Itzala goizez.
Iraupena: 1h30min.
Jaitsiera: Bidetik rapelatuz edo kableari ezkerrera jarraituz oinez, eskailera eta baranda metalikoak dituen bide bertikal batetik jaitsiz.
0 comentarios:
Publicar un comentario