Montgrony (Coll Roig) - Malalts de roca (5b, +120 m, derrigorrez 5a)

Bide oso polita. Kareharria kalitatekoa, oso kalitate onekoa. Luxuzko ekipamendua (kimikoak). Bilguneak katez lotutako bi kimikoz osatuak eta toki erosoetan jarriak.

Bideak “postaontzilandia” modura izendatzen ditudan zatiak ditu. Toki horietan postontzi baten moduko euste leku ugari agertzen ditu harkaitzak. Euste lekua hartzen duzunean hortik kamioi batekin zintzilika zaitezkeelako sentsazioa izaten duzu. Luze guztiak politak dira, baina L2 eta L3a benetan ederrak dira.

Bidearen hasieran R0 dago. Bere oinarria gorriz margotuta duen kimiko handi bat da. Justu bere gainean “M” letra aurkituko dugu harkaitzean markatuta (marka txikia da eta hasiera zaila da ikustea/aurkitzea).

Oharra: Bideak guk egin ez genuen beste luze bat du (L5). Aipamen oker bat geraman eta egin gabe utzi genuen. Aitzakia ona itzuli eta bidea berriro egiteko. 

 

Iristeko eta hurbiltzeko: Ikus hurrengo sarrera.

 

L1 (30 m, 8 aseguru, 5a). Hasieran, motzondoraino iritsi arte, harmailak. Zati hau begetazioz zertxobait jantzia dago, baina ez du molestatzen. Ondoren plakatxo batek estutu beharreko pasagunea duen sabel batean uzten gaitu. Guk eskuinetik egin genuen, baina bidea egin ondoren irakurritako aipamen batean, ezkerretik hobe dela zioten (hori dela eta bi aukerak marraztu ditut krokisean). Azken metroetan zati lurkara bat zeharkatzen da. Azken metro horiek joera gorakorra duen zeharkaldi bat dira (eskuin aldera). Zortzigarren asegurua, goian eta ezkerrean dago, ia bilguneko erlaitz oinarriaren altuera parean.

L2 (30 m, 8 aseguru, 5b). Ezker aldera egiten duen pitzadura polita bat igo behar da hasieran. Euste leku onak ditu. Ondoren “postaontzilandia” den plaka bertikala. Azken kimikoan dago luzearen pasagunea. Hobe ezkerreko pitzaduratik plakatik baino.

 

Ia horizontalean 10 m inguru ezkerrera egin arrakalez beteriko plakaren azpian jartzeko. Bilgunea aurkituko ditugun bi kimikoetako edozeinean egin daiteke (1,5 m inguru bananduta daude). Lehenengoari gorputzetik aseguratzeko aukera ere badago, lekuak hori uzten baitu.

 

L3 (25 m, 7 aseguru, 5a). Arrakalez ostutako plaka ederra. Noizbehinka baditu euste leku onak. Plaka gainditzean ezkerrera egin behar da eta horma labur bati ekin. Bertan dago luzeko pasagune gogorrena. Azken metroak euste leku onak dituen plaka batetik egiten dira.

L4 (25 m, 6 aseguru, 5b). Ageriko diedroa. Ondoren erdian kanal-pitzadura moduko bat agertzen duen ezproia.

Oinez 20 m inguru igo aurrean dugun hormaren oinarriraino. Bilgunea kimiko handi batean egin daiteke.

L5. Guk ez genuen egin. Azken bilgunetik bidezidorrari jarraituz ezkerrera egin behar da.

 

Jaitsiera: Oinez bidezidorretik. Zailtasunen bat duten zatiak altzairuzko kable batez osatutako bizi-lerroarekin daude babestuta eta destrepatu behar direnak ferratetan aurkitzen diren moduko grapekin.

 

Materiala: 8-10 zinta + bilgunerako materiala. Friendsak eta fisureroak ez dira beharrezkoak, baina beraiekin “jolastu” nahi baldin badugu, harkaitzak aukera handiak ematen ditu pitzadura eta zulo ugari baititu.

Arroka: Kalitatezko kareharri grisa.

Orientazioa: Hegoa.

Iraupena: 1h45min

Nork irekia: Antoni Alarcón eta Joan Baraldes, urria 2016.

Nork garbitua eta birrekipatua: Santi Sanz, ekaina 2019

 

Cambiar idioma (Castellano)