Montgrony - Coll Roig

Toki zoragarria. Baso-ingurune lasaia. Arrokaren kalitatea apartekoa da (eta agian motz geratzen naiz kalifikazio horrekin). Leku gutxitan aurkituko duzue hemen aurkituko duzuen kalitatezko kareharria. Arrakalak dituzten zati oso politak aurkezten ditu hainbat tokitan eta beste batzuetan izugarrizko euste lekuak, “postontzi” modukoak. Euste leku horiek harrapatzen dituzuenean badakizu hortik zu eta kamio bat eusteko gai direla. Benetan gozamena da.

Luxuzko ekipamendua. Gainera, nahi izanez gero, katxarreatzeko aukera dago.

Bide gutxi egin genituen abuztuan bero sargoriko egunak suertatu zitzaizkigulako, baina itzuliko garela zin egin dut.

Bideak oso ongi ekipatuta daude eta begetazioz garbiak. Bilguneak ere oso ongi eraikiak daude (“El forat de las bruixas” bideko R1an adibidez, egurrezko enbor bat jarrita dago horrela bilgunea egiteko tokia erosoagoa eta handiagoa egiteko). Hurbiltzeko eta jaisteko bidezidorrak garbiak eta ongi zainduak daude. Jaitsierako hainbat zati segurtasun kableekin babestuta daude eta zati motz bertikal batzuk ferratetan egoten diren grapa metalikoekin. Ekipamendu eta mantenu lan guzti hori Santi Sanz-ek egiten du. Ez dut ezagutzen, baina nire merezimendu eta  aitorpen osoa du hartzen ari den lanagatik.

 

Iristeko: Ripoll herritik, Campdevanol-etik pasata, Gombrén herrira hurbildu. Aurrera jarraitu eta errepidearen 2 eta 3. puntu kilometrikoen artean Montgrony-ko monastegira igotzeko bidegurutzea aurkituko dugu. Bergatik bagoaz, Guardiola de Bergueda herrira igo behar gara eta, La Poble de Lillet pasatuz, Gombrén aldera hurbildu.

Bide gurutzea hartu eta kilometro t´erdira eskuinean beste bidegurutze bat aurkituko dugu. Santa Maria de Montgrony adierazita dago. Eskuinera egin. Lehen 100-200 metroetan bide asfaltatua da, gero tarte luze batean zementuzkoa, ondoren berriro asfaltuzkoa eta azkenean zementuzkoa. Goian, bidegurutzetik 3,4 km-ra, ezker aldera irteten den pista bat aurkituko dugu. Ez hartu eta aurrera jarraitu. Metro batzuk aurrerago bidea banandu egiten da. Eskuinera hartuta monastegira joaten da. Guk ezkerreko adarra hartu behar dugu. Bidegurutzetik 4 km-ra zementuzko zati zabal bat aurkituko dugu. Bertan hainbat kotxe uzteko tokia dago. Aurrera jarraitu nahi baldin badugu mendiko pista batetik igo behar da. Lehen 100  eta azken 300 metroak kotxe normal batentzat nahiko egoera kaxkarrean daude (todoterreno edo kotxe altu batekin ez dago arazorik), baina kontu pixka batetik pasa daiteke. Pista Coll de Roig izeneko lepoan amaitzen da. Hainbat kotxerentzat lekua dago. Pistak guztira 1,4 km ditu.

 

Hurbiltzeko: Lepoan panel adierazle bat dago. Bere eskuinean mugarri dago eta mugarriaren alboan bidezidor bat jaiotzen da. Bide horri jarraitu behar zaio. Hasieran, harri handi batera iritsi arte, bideak beheko joera du. Gero biratu eta igotzen hasten da. Egin nahi dugun bidearen arabera, zertxobait gorago, eskuinera edo ezkerrera egin beharko dugu. Lepotik hormak nahiko urruti daudela dirudi, baina 10 minututan bideen oinarrietara iristen da.

 

Oharra: Arrakalaz beteriko plaka erraldoian (Alicorn eta Ullets d´Esmeralda bideak dauden plakan) ez ginen egon eskalatzen eta horregatik ez dut marraztu bertara hurbiltzeko bidezidorra (ez baitakit). Norbait argitzen badit sartuko nuke.

 

Cambiar idioma (Castellano)