St Llorenç de Montgai - Los Chichos (6a, 105 m, derrigorrez 5c)

Uste genuena baina gogorragoa suertatu da bidea. Behetik irekia. Eskalada mota aldetik luze oso desberdinak (plaka, gandorra, horma…)

Lehen luzeko horma-makurgune laburra gainditzeko estutu behar da (kanpora botatzen du) eta azken luzeari 6a zailtasuna ematen diogu. Lehen metroak ongi eskalatzen uzten ditu, baina zailtasunean oso mantendua eta paso fin ugari dituen plaka bertikala  da. Luzearen erdia egin ondoren gauza lasaituko dela pentsatzen duzu, baina oker zaude, estutzen jarraitu behar da. Ia amaiera iritsi arte ez du treguarik ematen.

 

Iristeko eta hurbiltzeko: Ikusi hurrengo sarrera.

 

L1 (20 m, 3 aseguru, 5c). Euste leku oneko plaka nahiko etzana hasieran. Lehen eta bigarren aseguru artean urrutiratzea, baina autobabesak jartzeko nahiko aukera daude. Ondoren horma-makurgune labur bat. Euste lekuak ditu, baina kanpo aldera botatzen du. Azken asegurutik bilgunera doan tartea zertxobait expoa da, gehien bat bigarrenarentzat zailtasun maila aldetik justu bazabiltza. Eskuin aldera egiten du eta erortzen bazara pendulu eder bat daukazu.

L2 (25 m, 5 aseguru, 4b).  Eskuin aldera irten. Gandorrera igotzeko pasagunetxo bat. Ondoren harri-bloke handiz osatutako gandor zabala. Blokeren bat edo besterekin arreta izan behar da.

L3 (30m, 1 aseguru, 3c). Azken plaka handira iristeko egin behar den trantsiziozko luzea. Lehen 15 metroak oinez egiten dira. Ondoren 5 m inguruko plakatxo etzana, parabolt batekin babestua. Bilgunea erlaitz eroso batean.

L4 (30m, 11 aseguru, 6a).  Bilgunetik ezkerrera ikusten den parabolt lerroa jarraitu behar da. Bilgunetik irten eta 3-4 metro ezkerrera desplazatu parabolt lerroaren bertikalaren azpian jartzeko eta igotzen hasi. Lehen metroak ongi egiten dira, baina hirugarren-laugarren asegurutik aurrera oinak ongi jartzea funtsezkoa duten pasagune finak aurkituko ditugu. Plaka bertikala da eta zailtasuna mantendua da. Txapen artean eskalatu behar da. Hori bai, noizbehinka deskantsatzea ahalbidetuko diguten euste lekuak aurkituko ditugu.

 

Jaitsiera: Bidea rapelatzeko prestatuta dago. Bilgune guztiak bi parabolt eta bi eraztunez osatuta daude. Aukera hori egokia da hormako beste bideren bat egin nahi bada. Oinez jaisteko atzean dagoen bidezidorra aurkitu eta oinez jaitsi. Kotxera iristeko guztira 25 min inguru beharko ditugu.

 

Materiala: 11 zinta + bilgunerako materiala. Fisu edota friends joko bat L1 luzerako.

Arroka: Kararria.

Orientazioa: Hegoa.

Iraupena: 1h 30 min.

Nork irekia (behetik): David Dominguez eta Juan Gutierrez, otsaila 2014.

 

Cambiar idioma (Castellano)