Aiako Harria (Aritxulegi) - Basurdeen begiratokia (4c, 160 m, derrigorrez 4b)

Orokorrean plaka etzanetatik zehar doan bide polita. Arroka itsasgarritasun handiko luxuzko granito zaharrez osatuta dago. Bere orientazioagatik neguko arratsaldetarako bide aproposa da eguzkiak bete-betean ematen baitio. Udaran, eguzkiak jotzen duenean, hobe izango da goizez egitea edo arratsaldean ilundu baino lehenago. Udaran egitasmo polit bat (aurretik enkargua emanez) iluntzerakoan eskalatu eta eguna Arritxulo aterpean afari eder batekin eta noski dagozkion garagardo sortarekin amaitzea izan daiteke.

Bidea oso ongi ekipatua dago kimikoekin. Justu behar diren tokietan daude. Zailtasuna eskuragarria da eta bilgune guztiak erosoak dira. Bere 3 minutuko hurbilketa “luzeak” hurbilketa luzeak gustuko ez dituzten horientzat erakargarri egingo dutelakoan gaude. Itzulia ere oso erosoa da. Ekipatzaileek itzultzeko bidea garbitzen lan ederra hartu dutela nabari da.

Bidea amaitzerakoan, azken bilgunetik, eguraldiak laguntzen badu guri gertatu zitzaigun bezala, kontrastez beteriko paisaiaz gozatzeko aukera izango dugu. Alde batean itsasoa eta bestean Pirinioak zuri-zuri, elurtuta. Benetan paisai zoragarria. Horrengatik soilik merezi du bidea egiteak.   

Laburbilduz, gozoki hutsa. Umeak eramateko edo bide luzeetako hastapen ikastaroak egiteko bide aproposa ere izan daiteke. Sarritan errepikatuko den bide horietako bat izango dela uste dugu.

Iristeko: Oiartzun herrira joan eta bertan Lesaka aldera (edo Arditurrira) doan GI-3420 errepidea hartu. Ergoien auzoa pasa eta Aritxulegi mendatea igo. Bidea Km8 kartela baino 100 metro aurrerago dago. Errepidearen ertzean kotxe batentzat lekua dago, baina hobe da beste 500 metro aurrera egin eta tunelaren edota aterpearen inguruetan aparkatzea.

Hurbiltzeko: Oinez errepidetik jaitsi (5 min). Hesira igo eta zeharkatu ondoren bidezidorretik bidearen hasierara igo (3min).

L1 (35 m, 8 aseguru, 4b). Bi hormatxoz banandutako plaka etzanen segida diagonalera iritsi arte. Ondoren zati bertikala, baina euste leku onekin.

L2 (25 m, 4 aseguru, 3c). Euste leku oneko plaka etzana. Hasieran gorantz eta ezkerrera egiten duen zeharkaldi bat eginez igo behar da eta ondoren dena zuzen.

L2-L3. Hurrengo hormaren oinarrian ipini arte oinez 15-20 m inguru egin.

L3 (25 m, 4 aseguru, 4c). Zertxobait kanpora botatzen duen 5-7 metroko horma bertikala, baina euste leku onekin (4c-ko zati laburra). Hasierako horma gainditzerakoan bidea zertxobait etzan egiten da eta erosoago igotzen da. Zertxobait eskuinera eginez zuzen igo.

L3-L4. Oinez 25 m inguru egin.

L4 (55 m, 9 aseguru, 4a). Zeta handi bat egiten duen luzea. Hasieran harmaila etzanak ur-arrasto baten ezkerrean dagoen erresalte txiki batera iritsi arte. Erresaltea igo (ongi babestua gertu dauden bi aseguruekin) eta ur-arrastoa horizontalki zeharkatu. Lurrez zertxobait jantzita dagoen zati batetik zehar eskuin aldera egiten duen zeharkaldi horizontal batek (oso erraza) bilgunera eramango gaituen azken plaka etzanean uzten gaitu. Sokaren marruskadura nahiko nabaria da. Eraman zinta luzeak luze honetarako.

L4-L5. Oinez 25 m inguru egin.

L5 (20 m, 4 aseguru, 3a). Arroka trinkoz osatutako plaka oso etzana.

Bidearen bigarren zatia hemen: "Basurdeen begiratorkia 2. zatia"

Jaitsiera: Azken bilgunetik irten eta aurkituko dugun bidezidorretik Aiako Harriko Erroilbide gailurrera igotzen den bidea aurkitu arte igo. Otez osatutako zatia da, baina ekipatzaileek ongi garbitu dute eta ote adarretan ipinitako plastiko zatiz adierazita dago (nabari da lan handia egin dutela). Ez du galerarik. Erroilbidera igotzen den bidera iristerakoan, eskuinera egin eta Arritxulora jaitsi. Guztira 20 min inguru.

Behar izatekotan, bideko bilgune guztietatik arazorik gabe rapela daiteke.

Materiala: 9 zinta + bilgunerako materiala. Fisureroak eta friendsak soberan daude, ez dira behar.

Arroka: Granito zaharra.

Orientazioa: Hego mendebaldea.

Iraupena: 1h30min.

Nork ekipatua: Juanillo eta Cesar Atorrasagasti (laguntzaileak Alberto Fernandez eta Stig Larrañaga), urria/azaroa 2015.

Cambiar idioma (Castellano)