© X. Larretxea. Con la tecnología de Blogger.

2010/11/20

Alboko bideen antzekoa. Maila eskuragarria, zailtasuna nahiko jarraitua eta, orokorrean, arroka ona. Lehenengo luzeak jarraitzeko gogoak kentzen ditu, baina bigarren luzetik aurrera asko hobetzen da gauza. Eskalada bertikalagoa bihurtzen da eta begetazioa luzeetatik desagertzen da.
Ia bide osoa ekipatuta dago, L5 izan ezik. Bertan 15-20 metroko tarte bat dago segururik gabe, baina friend-ekin, fisureroekin edo arroka-zubiren batekin babesteko nahiko posibilitate daude.

Iristeko: N-1 errepidez Egino herrira hurbildu eta eliza inguruan aparkatu.
Hurbiltzeko: Elizatik hormen aldera doan kalea jarraitu. Lehenengo bidegurutzean eskuinera hartu. Ondorengoan ezkerrera. Berehala ataka metaliko batekin aurkituko gara (ikus argazkia). Zeharkatu eta pistatik igo. Ur-biltegiaren ondotik pasa eta apur bat aurrerago pista bitan banatzen da. Eskuineko bidea hartu. Hormetara iristerakoan eskuin aldera jarraitu lehortutako erreka bat aurkitu arte (euri asko egin duenean, batzuetan, ura eramaten du). Erreka zeharkatu eta ezkerrean geratzen zaigun maldatik igo. Guztira kotxetik 20 min inguru.


L1 (45m, 9 aseguru, 4c). Lurrez jantzitako kanala. Ondoren hormatxo bat. Gero plaka etzanagoetatik jarraitzen du luzeak bilguneraino. Hasierako kanalaren amaieran eskuineko parabol lerroa jarraitu behar da. Ezkerrean ikusten direnak beste bide batenak dira.
L2 (40m, 7 aseguru, 5b). Bilgunetik irten eta lehenengo asegurura iristeko plaka oso etzan batetatik (zati erraza) 15 metro inguru igo. Plaka bertikal bat hasieran nahiko zimurtsua, ur-tantekin osatutakoa. Jarraian beste plaka bat aurrekoa baino bertikalagoa. Ongi babestutako pasabide fin bat bilgunera iritsi baino lehen. Aseguruak gertu daude eta A0-n egiteko aukera dago.
L3 (40m, 11 aseguru, 5a). Arroka delikatua lehenengo 4 metrotan, lehengo aseguru punturaino iritsi arte. Ondoren luzeko pasagune gogorrena duen hormatxo bat. Euste-leku ugariak dituen plaka bertikal batetik jarraitzen du. Bederatzi eta hamargarren aseguruen arteko distantzia apur bat luzea. Zatia erraza da, baina ongi etor lezake friend ertain edo zinta bat.
L4 (30m, 7 aseguru, 4c). Bilgunetik irten eta oinez 15 metro inguru egin hurrengo plakaren oinarrira iristeko. Hormaren azpian bilgune berri bat egin daiteke (zuhaitz bat dago zinta batekin). Luzea plaka etzan batzuekin hasten da. Gero horma bertikal bat, baina euste-leku ugariekin. Lehenengo asegurua 5 metro ingurura, baina zatia arroka-zubi edo friend batekin babesteko aukera dago.
Bilgunetik eskuin aldera 80-100 metro oinez egin bi enbor dituen haritz batetaraino. Bere oinarritik bi parabolt lerro ikusten dira. Gurea eskuinekoa da.
L5 (30m, 8 aseguru, 4c). Goiko aldean semiekipatuta dagoen luzea. Lehenengo asegurua urruti, baina zatia erraz babes daiteke arroka-zubi edo friend batekin. Euste-leku oneko plaka bertikal batetik jarraitzen du luzeak. Seigarren eta zazpigarren aseguruen artean ekipatu gabeko 15-20 metro daude, baina friend-ekin, fisureroekin edo arroka-zubiren batekin babesteko nahiko aukerak daude. Bilgunea krestako arroka-zubi batean (eraikitzeke).

KONTUZ! Luze honetako ekipamenduan berriak daude. Ikus hemen.


L6 (20m, 2 aseguru, 3b). Kresta erraza, amaieran ongi babestutako hormatxo batekin. 


Eskalatzen jarraitzeko gogoarekin amaitu badugu, Antxonen krokisak dio 200 metro gora eta eskuin aldera ibilita 5c maila duen azken luze txiki bat dagoela (20 metro). Luzeak goi goian uzten digu.


Jaitsiera: Azken bilgunetik, bide egokienetik, goraino igo (mugarri batzuk badira). Goian ezkerraldera jo eta Azor-eko bide arruntetik oinez jaitsi.Lurra bustiarekin kontuz ibiltzeko jaitsiera da. Kotxeraino guztira 50-60 min inguru.
Jaitsieraren krokis on bat hemen aurki dezakezue: http://gorobeletikmundura.blogspot.com/2011/08/bajada-egino-jaitsiera.html  
R4-raino bidetik erraza da jaistea (bilguneak bi parabolt eta bi eraztunekin osatuak daude). R5-etik aurrera hobeto da goitik irtetea.

Materiala: 12 zinta + bilgunetarako materiala. Bi edo hiru friend ertain eta zinta luze batzuk azkenaurreko luzerako.
Arroka: Kareharria
Orientazioa: Hegoa
Garaia: Urte osoa (arrokari lehortzeko denbora ematen baldin badiogu).
Iraupena: 3h15min
Ekipatzailea: Antxon Gorrotxategi




Categories: , ,


Komentariorik egin nahi baduzu,hau da lekua.

2 comentarios:

  1. Aupa Xavier! Noizko zure krokis guzti hauek liburu batean? :) Pirineo Norteko liburua mundiala da, ta ildo berean Euskal Herriko eskalada luze eta errezen bilduma bat faltan somatzen da. Milesker zure lanagatik eta animatzen zaitut EHko eskalada luzeen bilduma egitea. Esker mila benetan! Iker

    ResponderEliminar
    Respuestas
    1. Kaixo
      Eskerrik asko gorespen horiengatik, baina oraingoz ez dut asmo hori,
      Egia esatekotan, noizbait burutik pasa zait, baina liburua ongi osatzeko bide pilo bat faltan botatzen ditut. Agian aurrerago.
      Ongi izan.

      Eliminar