© X. Larretxea. Con la tecnología de Blogger.

2013/01/15

Lleida hiriburutik 40 km eskasera egon arren lasaitasunaz beteriko lekua da Sant Llorenç de Montgai. Herria txikia da, baina oso atsegina. Bikote oso zintzo batek daraman aterpea dago herrian bertan. Instalazioak oso onak ditu (Refugi La Cova; Tel 691807581, Eva-taz galdetu). Herrian ez dago dendarik, baina, zerbait behar izatekotan, kotxez 10 minutura Balaguer dago. Herri handiagoa da eta bertan denetik aurki daiteke.
Ingurua klima lehor bat izateagatik bereizten da eta, beraz, udaberrian, udazkenean eta neguan eskalatzeko aukera ederrak eskaintzen ditu. Ziurrenik udaran bero gehiegi egiten du, baina Evak esan zigun bazirela orientazioagatik itzalean zeuden bideak eta, beraz, udaran ere eskalatzeko aukera zegoela.

Hormak kotxez mugitura herritik 5 minutu eskasera daude. Neguan goizeko 10etatik aurrera eguzkiak bete-betean ematen die eta, pantanoak sortzen duen behe-lainoa ez bada, oso goiz eskalatzen has daiteke eta egun oso aprobetxatu. Behe-lainoa bada, ordu horretarako Formiguera horman (altuago baitago) eguzkiak jotzen du eta eskalatzen has daiteke  lasai-lasai (abenduak 27an kamisetan eskalatzen egon gara).
Arroka kareharrizko tillita da. Kaltzio karbonatoagatik eta hareagatik gogortu diren kareharrizko harri blokez osatuta dago. Bloke horiek tamaina desberdinekoak dira jatorri glaziarra baitute. Itsasgarritasun oso oneko eta euste-lekuz beteriko arroka da.
Eskalada jarduera inguru hauetan dagoen ferratarekin ("Cagate Lorito" ferrata oso zaila) edo Roca del Bous historiaurreko aztarnategi Neandertalera bisitarekin konbina daiteke (aterpean galdetu).

Iristeko: Lleidatik Balaguer aldera jo. Bertan Camarasara eramaten duen C13 errepidea hartu. Camarasara  iritsi baino kilometro bat lehenago Sant Llorenç de Montgaiera eramango gaituen errepidea hartzeko bidegurutzea aurkituko dugu.


Contrafort del Cilindre
Arratsaldean iritsi ginen eta azken izpiak aprobetxatzeko asmoarekin bide  hauek egitea erabaki genuen (nahiz eta bakarra balitz bezala har daitezkeen). Inguru  honetako arrokarekin lehen kontaktua izateko egokia izan daitekeen bide motza da, hurbilketa are motzagoarekin. Oso ongi ekipatua (agian lehen luzea gehiegi). Ziurrenik San Llorenç-eko bide errazenak dira.
Dirudienez, lehen, militarrak entrenatzen ziren tokia zen eta burilez josita omen zegoen. Lluís Olòndriz, Sergi Miranda eta Juan Ramón Segura-k berrekipatu dituzte. Umeentzat oso egokiak dira eta, beraiek beraien blogean dioten bezala (http://escaladaperatontos.blogspot.com.es), 70 urtetik gorakoentzat ere.
Hurbiltzeko: P aparkalekuan kotxea utzi (ikus marrazkia). El Contrafort  aurre-aurrean geratzen da. Roca del Bous-era doan bidezidorra  hartuz  2 minututan hormaren oinean gaude.

Per la Canalla (5a, 50 m, derrigorrez 4b)
L1 (25 m, 12 aseguru, 4a). Oinentzat eta eskuentzat euste-leku ugari dituen plaka etzana. Bilgunea hormaren erdiko zatian, bloke handi batean.
L2 (25 m, 6 aseguru, 4a). Ezkerreko bariantea (gezi bat eta 4 zenbaki handi bat horiz horman margotua). Hasieran plaka etzana. Laugarren aseguruan bi aukera daude. Ezkerrekoa apur bat gogorragoa da. Hormatxo bertikal bat, 3 metro ingurukoa, euste-leku onekin, baina arrokarekin arreta pixka bat izan behar da.

Sortida per la Mainada (4b, 50 m, derrigorrez 4a)
L1 (25 m, 12 aseguru, 4a). Oinentzat eta eskuentzat euste-leku ugari dituen plaka etzana. Bilgunea hormaren erdiko zatian, bloke handi batean.
L2 (25 m, 8 aseguru, 4b). Eskuineko bariantea (gezi handi bat eta 5 zenbaki handi bat horiz horman margotua). Euste-leku onak dituen plaka batetik jarraitzen du bilgunera iritsi arte.


Jaitsiera: 60 metroko bi sokekin rapel  batekin lurrean gaude. "Sortida per la Mainada" bariantearen bilgunean ez dago eraztunik eta, beraz, rapelatzeko "Vía per la Canalla" bideko bilgunera pasa beharko dugu. Beste aukera bat atzetik oinez jaistea da.

Materiala: 12 zinta + bilgunerako materiala.
Arroka: Kareharria (tillita).
Orientazioa: Hego-ekialdea.
Iraupena: 45min.
Nork berrekipatua: Lluís Olòndriz, Sergi Miranda eta Juan Ramón Segura, 2012.

Categories: , , ,


Komentariorik egin nahi baduzu,hau da lekua.

0 comentarios:

Publicar un comentario