© X. Larretxea. Con la tecnología de Blogger.

2013/09/02

Itsasgarritasun handiko hareharri marroi batean burutzen da eskalada. Bigarren luzeko erdian dagoen horma bertikal leuna izan ezin, lehenengo hiru luzeak plaka etzanez osatuta daude. Oinak ongi ipini eta beraietaz fidatu behar den itsasgarritasunezkoa eskalada da. Ur-txorrotaden arrastoa zeharkatu behar den lekuetan arrokak gehiago irrits egiten du eta atentzio gehiagorekin ibili behar da.
Altura hartzen den arren "patio" sentsaziorik ez da. Rapelatzerakoan ematen du (nahiz eta aurrez jakin ez dela horrela) eskuak erabili gabe oinez igotzeko moduko pareta dela. Hemen deskribatzen den bidea inguru honetako errazena da. Inguruan badira besta hainbat bide ekipatuak, baina zailagoak dira.

Iristeko: Arguis (Huesca) herrira hurbildu. Herria zeharkatu eta apur bat aurrerago aurkituko dugun bidegurutzean ezkerrera, Bestué de Rasal aldera, hartu. Errepidea 1,6 km jarraitu. Zelaigune handi bat aurkituko dugu (obra-hondakin eta zaborra ertzetan) gatz silo berde bat duena bere aurreko eskuin erpinean. Kotxea hor utzi. Aurrez-aurre, goian, horma dugu.

Hurbiltzeko: Errepidearen beste aldean jaiotzen den bidezidorra hartu. Bidea mugarriz ongi adierazita dago baina oso labirintikoa da (igo, jaitsi, ezkerrera, eskuinera ... egiten du). Adi egon behar da arrastoa ez galtzeko. Hormaren oinarrira iristerakoan "Con cono y alicates" izena aurkituko dugu paretan margotuta. Hiru metro inguru zuzen igo eta gure bidearen hasiera aurkituko dugu. Izena paretan margotuta dago. Kotxetik 45 min inguru.


L1 (55m, 10 aseguru, 5c). Plaka etzanean ematen den itsasgarritasunezko eskalada. Zuzen igo eskuinetik ezkerrera jaisten den pitzadura bateraino. Ezkerrera zeharkatu 4-5 metro (ur-txorrotaden arrastoa; pasagune fina itsasgarritasun faltagatik) eta eskuin aldera diagonalean igo bilgunea dagoen erlaitz handiraino. Bigarren plaka-zati honetan bada oinak ongi ipini behar den pasagune finen bat.
L2 (40m, 10 aseguru, 6b edo 5a/A1). Hasieran, horma bertikalaren oinarrira iritsi arte, plaka etzana. Erreseña gehienek horma A0 modura gainditzen dela diote, baina erosoago ateratzen da oinentzat zinta batzuk erabiliz A1 modura egiten badugu.
L3 (35m, 2 aseguru, 4b). Plaka oso etzana hasieran. Bilguneraino azken 15-20 metroak oinez igotzen dira.
L4 (30m, 10 aseguru, 6b edo 5c/A1). Eskalada mota guztiz aldatzen da. Itsasgarritasunezko plaka etzanetatik igotzetik eskalada bertikal batera pasatzen gara. Kanal moduko bat duen horma bat hasieran. Pasagune gogorra erlaitz batera igotzeko. Hortik horma desplomatuaren azpian uzten gaituen plaka etzan batera pasatzen gara. Bi parabolt daude (bigarrena zinta batekin) pasagunea A1 modura egiten laguntzeko (beste erreseña batzuetan A0 modura egin daitekeela agertzen da, baina oso gogorra iruditzen zaigu horrela egiteko). Desplomatua gainditu ondoren bilguneraino azken metroak euste-lekuak dituen horma bertikal batez osatuak daude.



Jaitsiera: Bidetik rapelatzen. L1 eta L2 luzeek rapelatzeko bilgune gehigarriak dituzte.

Materiala: 10-12 zinta + bilgunerako materiala. Friends txikien joko bat.
Arroka: Hareharri marroia. Oso itsaskorra.
Orientazioa: Hegoa.
Garai: Udaberria edo udazkena. Udaran bero asko (goiz ibili). Euria egin badu egun batzuk itxaron behar dira ur-txorrodatak lehortu arte.
Iraupena: 2h
Ekipatzaileak: J. Plaza eta Charlie Bona, 2010.


Categories: , ,


Komentariorik egin nahi baduzu,hau da lekua.

0 comentarios:

Publicar un comentario