Goi-mendiko jarduera. Hurbilketak, eskaladak eta itzuliak
9-10 orduko jarduera suposa dezakete. Egoera fisiko onean eta goiz esnatzea
eskatzen du. Beste aukera bat aurreko egunean aintzira dagoen soroetara igotzea
eta bertan lo egitea da. Aukera lasaiagoa da, baina pisu gehiago eramatea
suposatzen du. Bakoitzak erabaki dezala.
Anayet mendiko arroka andesita da (arroka igneoa). Bloke
handiz osatuta dago eta, orokorrean, ertz zorrotzak erakusten ditu. Euste leku
onak eta itsasgarritasun ona (L4 izan ezik; oso higatua) dituen arroka da. Zati
erraz eta erlaitzetan oraindik harri solte ugari dago. Behe parteko hirugarren
mailako luzeak lurkarak eta belarkarak dira. Niretzat luze delikatuena L5 da,
ez bere zailtasunagatik, sokarekin harriak askatzeko aukera handia dagoelako
baizik. Horrek arreta handiarekin igotzea suposatzen du.
Lehen bi luzeak bertikalak dira eta L6tik L10er, nahiz
eta tarte labur bertikal batzuk agertu, plaka etzanetan eskalatzen da. Plaka
erraldoiak zimurdura ugari dituen arroka aurkezten ditu eta, bilatuz, beti dago
non eutsi.
Bidea ongi ekipatua dago. Paraboltak 8 mm-koak dira.
Bidearen zailtasun bat hurrengo parabolta non dagoen aurkitzea da.
Harkaitzarekin oso ongi mimetizatzen dira eta ez bagaude adi baten bat
saltatzeko aukera dago. Erreferentzia bezala, gehien bat lehen luzeetan,
kontuan izan 3-5 metrotik behin parabolt bat aurkitu behar dugula. Zailtasuna
igotzen den zati (edo pasagunetan) aseguruak gertuago daude.
Bilgune gehienak toki erosoetan egiten dira eta 2
paraboltez osatuta daude (horietako bat eraztunarekin). Salbuespenak R3, R10
eta R11 dira non 3 parabolt aurkituko ditugun. Azken bilgunetik oinez igotzen
da gailurrera.
Udaran jende ugari biltzen da. Guk egin genuenean (eta
asteartea zen) lehenak sartu ginen, baina gure atzetik beste lau sokada ibili
ziren. Aurretik edo atzetik jendea eramateak eskalada asko baldintza dezake.
Iristeko: Portalet
mendatera hurbildu eta bertan dagoen aparkaleku erraldoian kotxea utzi.
Hurbiltzeko: Batellero telesillaren amaieraraino igo behar da. Telesilla-zutoinen
alboan bidezidorra dago. Igoera gogorra da eta gora igotzeko 45 min inguru
beharko ditugu. Goian, kartel handi baten alboan, bidezidor nabari bat jaiotzen
da. Horri jarraituz aintzira txiki batera igoko gara. Aintzira inguratu eta
bera amaieran bidea bitan zatitzen da. Eskuineko besoa hartu. Bidea etxola
txiki baten gainetik pasatzen da eta, gora-behera txiki batzuekin, emeki gora
eginez Anayeteko aintzira nagusia dagoen tokiraino eramango gaitu (1h40min
inguru kotxetik). Horma aldera igo eta bidearen hasierara hurbildu
hartxingaditik igoz. Guk, guztira, 2h10min behar izan genituen.
Erreferentzia bezala bidearen
hasieran, lehen paraboltean, kolore urdineko plastikozko zirkulu handi bat dago
jarrita. Bertatik zintzilikatuta, zinta batean, bidearen izena idatzita dago.
L1 (35m, 9 aseguru, 5a). Bloke ugariz osatutako luze bertikala. Bloke
bereizgarri handia igaro ondoren (3. asegurutik aurrera) emeki eskuinera eginez
igo behar da.
L2 (20 m, 6 aseguru, 4c). Zuzen igo. Luze bertikala, aurrenekoa bezala, baina
zertxobait errazagoa. Arroka gorriagoa da.
L3 (25 m, 3 aseguru, 3c). Zeharkaldi
motz bat, ia horizontala, eskuinera (belarkara). Ondoren kanal etzan batetik
igo behar da.
L4 (25 m, 9 aseguru, 5c). Arroka oso
higatua duen plaka handia. Plakatik bertatik igotzen da batzuetan eta beste batzuetan
ezkerrean geratzen den diedroaren laguntzarekin (babaresan). Euste leku txiki
ugari ditu, baina deigarria da zein higatua dagoen harria. Horrelakorik ez dugu
aurkituko bide osoan. Hain higatuak egoteak zailtasun maila bat gehiago ematen
dio.
L5 (25 m, 4 aseguru, 3c). Bilgunearen gainean geratzen den kanal belarkaratik
zuzen igo. Zati belarkara eta harri solte askorekin. Harririk ez botatzeko
arreta handia jarriz igo behar da. Bilgunea erlaitz belartsu handi batean dago.
Bilgunea zertxobait izkutatuta dago. Erreferentzia modura gorriz margotutako
parabolt handi baten eskuinera, 1 metrotara, dago.
L6 (35 m, 9 aseguru, 5a). Bloke handiz osatutako eta euste leku onak dituen
horma hasieran. Ondoren plaka erraldoira irtengo gara eta plaka etzan batetik
igotzen da.
L7 (35 m, 7 aseguru, 4b). Plaka
etzan erraza. Pasagune zertxobait finagoa bigarren eta hirugarren aseguruen
artean.
L8 (35 m, 11 aseguru, 4c). Plaka
hasieran. Ondoren aseguruak gertu dituen horma labur bat eta azkenik plaka
labur eta harmaila segida bat.
L9 (35 m, 10 aseguru, 5a). Eskuinetik
ezkerrera igotzen den plaka etzan labur bat hasieran. Ondoren bere eskuinean
pitzadura handi bat duen 5 metro inguruko horma bertikala (euste leku onak). Metro
batzuk aurrerago beste horma bat. Hau motzagoa da, baina aurrekoa baino
zertxobait gogorragoa. Azken metroak harmaila belarkak.
L10 (25 m, 7 aseguru, 4c). Eskuinetik
ezkerrera igotzen den blokez osatutako horma laburra. Ondoren aurreko luzeetan
aurkitu dugun antzeko plaka etzan batetik igotzen da.
R10 bilgunea aurkitzeko, gandorrera irtetean, gu gauden
tokitik 5 metro behera, ezkerrera, dagoela kontuan izan behar dugu. Leku eroso
batean dago, baina bigarrena aseguratzeko ez da hain erosoa sokak gandorraren
ertzarekin marruskadura handia duelako. Hobe L11 luzearekin jarraitzea.
Gehienez 40 m inguruko luze bat irten daiteke. Guk ez genuen horrela egin,
baina gure atzetik zetorren sokada batek bai.
R10 bilgunearen atzean, 50 m ingurura, Anayet gailurrera
igotzen den bide arrunta ikusten da. Ematen du bidea uzteko aukera egon daitekela
bilgune honetatik.
L11 (20 m, 4 aseguru, 3b). Gandor
erraza, ia horizontala, harri-bloke handiz osatua.
L12 (35 m, 4 aseguru, 4c). Harri-bloke handiz osatutako gandorra. Zati
batzuetan bertikala. Guk 4 aseguru kontatu genituen, baina agian, baten bat
pasatu zitzaigun. Autobabesteko aukerak daude.
Jaitsiera: Oinez, Anayet gailurrera igotzen den bide arruntetik.
Materiala: 12 zinta + bilgunetarako
materiala. Friendsak edota fisureroak aukerazkoak.
Arroka: Andesita.
Orientazioa: Ekialdea.
Iraupena: 3h45min.
Nork ekipatua eta
irekia: Luis Royo eta Julio Benedé, 2010.
0 comentarios:
Publicar un comentario