Kopakoarri - Urdaburu ertz herrikoia (5c, 100 m, derrigorrez 5a

Aspaldidanik Kopakoarri ezagutzeko gogoa nuen. Eskola gogorra denaren ospea du, baina Euskal Herrian granitoan eskalatzeko aukera ematen  duen leku gutxi horietako bat da. Bide berriak ekipatzen ari dira eta badirudi, apurka-apurka, berriro ere modan jartzen ari dela. Oraingoz leku lasaia izaten jarraitzen du. Jende gutxi ibiltzen da eta eskalada egun lasai bat igarotzeko leku aproposa da. Krokisas nahi izatekotan hurrengo loturan aurki ditzakezue (gipuzkoaneskalatzen). Bilguneak 2 paraboltez osatuak daude eta leku oso erosoetan aurkitzen dira.

Luze ugariko bide gutxi daude, nik dakidanez, baina egin dugunarekin sorpresa polita jaso dut. Zailtasun aldetik oso eskuragarria da eta  nahiz eta bigarren eta hirugarren luzean aseguruak beraien artean apur bat urruti egon, ongi ekipatua dago. Arroka granito zahar trinkoz osatua dago. Oso itsasgarritasun handiko da, hainbeste batzuetan oinetan lixa duzula dirudi. Krokisen batean bigarren luzeari 6a(5c/A0) maila ematen diote, baina niri ez zait hainbestekoa irudi. Gauza konplikatuz eta plaka ezkerretik igoz, suposatzen dut horrela atera daitekeela, baina eskuineko ertzari jarraituz ez dut uste derrigorrez 4c mailatik pasatzen denik.

Altuera sentsazio gutxiko bidea da eta R1etik eta L2ko bloke handitik oinez eta L2ko lehenengo lepotxotik destrepatuz, bidetik jaisteko aukera dago. Horri ekipamendua gehitzen badiogu, luze ugariko bidetan hasteko bide aproposa dela uste dut. Azken bilgunera iristerakoa Aiako Harri aldera dauden bistak zoragarriak dira.

Iristeko: Donostiatik Oiartzunera joan eta hirigunean bertan Lesakara doan GI-3420 errepidea hartu. Aritxulegi mendatea igo eta Endara urtegira jaitsi. Presa gurutzatu eta 400 metro aurrerago ezkerretara dagoen Ola-Berri jatetxeko bidea hartu. Zementuzko pistatik igotzen jarraitu (aldapa gogorrak) Telleriko lepora iritsi arte. Bertan 3-4 kotxerentzat aparkatzeko lekua dago.

Hurbiltzeko:  Gailurrera doan bidea hartu eta handik minutu batera (50 m ingurura) zuhaitz batzuen alboan, ezker aldean, jaiotzen den bidezidorra hartu. Bideari jarraitu eta 10 min ingurura harkaitzetara iritsiko gara. Lehenengo hormak inguratu eta eskuinean aurkituko dugun lehenengo kanal nabaritik igo. Kanal bidezidor nabari baten arrastoak ditu. Bertatik 50 m inguru igo eta trepada txiki bat gainditu ondoren Bordillos izeneko sektorera iritsiko gara. Bertan hasten da bidea. Nabari  ikusten dira bideko paraboltak hormaren ezker aldean. Guztira 15 min inguru kotxetik.

L1 (30 m, 6 aseguru, 5b). Lehenengo 15 metroak plaka bertikal batetik doaz. Pasagunetxo finen bat badu. Hau da bide osoko zatirik zailena eta mantenduena. Zati honetatik aurrera zailtasuna nahikotxo jaisten da. Erlaitz batean dagoen 2 kankamoz eraikitako bilgune zahar batera iritsiko gara. Ez egin bertan bilgunea. Bertan espresaren bat jarri eta grada batzuetatik eskuin aldera eginez igotzen jarraitu. Hormatxo bat gainditu eta belarrezko erlaitz handi batera irtengo gara. Aurreko horman aurkituko dugu bilgunea.

L2 (45 m, 5 aseguru, 5c edo 4c/A0). Eskuin aldera 15 metro inguru oinez egin eta bloke handi batera igo behar dugu. Hobe da hemendik eta ez bilgunetik aseguratzea. Erosoagoa da eta lehenengoa doanarentzat soka bilduagoa joango da. Lehenengo orratzeraino espoloitxoaren eskuineko ertzetik igo. Sarreran pasagunetxo fin bat dago, baina konplikatzen bada, buru gainean geratzen den paraboltari eutsiz gaindi daiteke. Ondoren kresta txiki batetik jarraitzen du eta, azkenik, plakatxo batetik jarraituz, bigarren orratz bat gaindituz, bigarren lepotxo batera iritsiko gara. Bertan aurkituko dugu bigarren bilgunea.

L3 (30 m, 4 aseguru, 4b). Arroka trinkoz osatutako plaka etzana. Grada txikiz eta ondulazioz beteta dago. Erdiko zatian aseguruak nahikotxo aldetzen dute, baina oso zati etzana da eta ez du inolako konplikaziorik.

Jaitsiera: Gailurrera begiratuz, eskuineko belarrezko kanala hartu behar da. Aldapa gogorra du, baina zailtasun aipagarririk gabekoa da. Erresalte txiki bat aurkitu arte bertatik jaitsi. Konplikazio gutxiko destrepe txiki batek Eguzki Lore sektorean utziko gaitu. Sektorea eroritako zuhaitzarengatik identifikatuko dugu. Bertatik hormaren oinarrira, destrepe txikiren bat gainditu ondoren, 10 minutu inguru beharko ditugu.

Materiala: 6 zinta + bilgunerako material.

Arroka: Oso itsasgarritasun handiko granito zahar urratzailea.

Orientazioa: Hegoa.

Iraupena: 1h10min.
Nork ekipatua: Sonia Rodriuez eta Txingu Arrieta, 2012ko udaran.

Cambiar idioma (Castellano)