© X. Larretxea. Con la tecnología de Blogger.

2014/08/08

Eskalada oso bertikaleko bidea, baina nahiko erraza. Hasieran arroka apur bat apurtua dagoela dirudi, baina hainbeste jende pasa denez euste-lekuak onak dira (ematen du erori behar zen guztia erorita dagoela). Riglos inguruko eskaladari trikimailua hartzeko bide egokia izan daiteke. Bideaz guztiz gozatzeko, diedroko progresio-teknika ongi menperatua izatea komeni da. Hala ere, ez da eskola-eskalada bateko bidea. Txapak (kolore zurikoak) apur bat urruti daude eta friendsak edo fisureroak ipintzeko aukerak txikiak dira. Hala ere, ondoren, eskalada motara ohitzen zarenean, ez du ematen hain urrun daudenik.
Bidea “Aguja Roja” delako beste bide gehienen jaitsiera bidea da. Beraz, rapelatzen ari den beste soka-bikoteren batekin egin dezakegu topo. Pazientzia.
Bilgune guztiak oso erosoak dira. Lehenengo biak 12 mm-ko bi parabolt eta eraztunez osatuak daude eta beste biak mokoak inguratzen dituzten kableez. 60 metroko soka bakarrez eskalatzen badugu hirugarren luzearen erdian tarteko instalazio bat dago, baina eraztuna duen 12 mm-ko parabolt bakar batez osatua dago soilik.

Iristeko: Riglos herrira hurbildu. Herri sarreran dagoen bihurgunean, eskuinean dagoen asfaltatutako pista hartu. Kanposantura igo eta bere alboan dagoen aparkalekuan kotxea utzi.

Hurbiltzeko: Hormetara doan pista hartu. Lehenengo bidegurutzean eskuinera egin eta pistari jarraitu. Oinez hasi eta 10-15 minutura mugarri bat aurkituko dugu. Aguja Roja delakora joateko igoera adierazten du. Beste 15 min inguruko igoerak bidearen oinarrian uzten gaitu. Kotxetik, guztira, 30  min. inguru.

L1 (25 m, 5 aseguru 5a). Diedro-tximinia. Txapa guztiak eskuineko horman daude, Gómez-Laguna orratzean. Azken asegurua jartzea ez ahaztu, bigarrenak izan dezaken pendulua babesten du eta.
L2 (25 m, 5 aseguru 4c). Eskuinetik ezkerrera igotzen den plaka. Ondoren, bilgunera iristeko, diedrotxo bat gainditu behar da. Bilgunea jarleku eder batean dago. Adi, laugarren asegurutik zuzen gora egin. Gure ezkerrean ikusten den bilgunera ez sartu.
L3 (35 m, 9-10 aseguru 4c). Diedro-tximini handia. Sabaitxo bat erdi aldera eta bilgunera igotzeko sabeltxo bat dira luzeko zailtasun aipagarri bakarrak.
L4 (25 m, 3 aseguru 4a). Harri handiko plaka nahiko etzana. Luzeak duen interes bakarra gailurrean amaitzea da.


Jaitsiera: 60 metroko bi sokekin (edo 70 metroko soka bakarrarekin) 3 segidan jaisten da. R4tik R3ra, R3tik R2ra eta hemendik lurrera. 60 metroko soka bakar batekin hirugarren luzean beste rapel gehigarri bat egin beharko litzateke.

Materiala: 9-10 zinta + bilgunerako material. Friendsak edota fisureroak erabiltzeko aukera gutxi.
Arroka mota: Tillita (bloke irregularrez osatutako konglomeratua)
Orientazioa: Iparra.
Iraupena: 2h.
1. igora: Angel Serón eta Francisco Fau, ekaina 1947.


Categories: , ,


Komentariorik egin nahi baduzu,hau da lekua.

0 comentarios:

Publicar un comentario