Benetan oso etzanak diren plaketatik zehar doazen bi
bide dira. Hain etzanak dira batzuetan “lau hanketan” igotzen direla. Plaka oso
leunetan ematen den itsasgarritasunezko eskalada da. Arrokak oinentzat eta
eskuentzat mikroeuste-lekuak ditu eta plakak hain etzanak direnez nahikoak dira
igotzen laguntzeko. Ia luze gehienek organo-hodiz osatutako zatiak dituzte bertako
eskalada bereziarekin. “Tonton coinceurs” bidea nahiko gertu dauden aseguru
ugariekin oso ongi ekipatua dago, baina “Babylon by bus” bidean gauza aldatu
egiten da. Bigarren horretan organo-hodiak agertzen diren zatietan aseguruak
nahiko gertu daude (oso gertu ere ez), baina plaka leunetan aseguruak oso
urruti daude (10 metrora ere) eta beraz, ekipatzaileek dioten modura, buruz
ongi eta zailtasun maila menperatuta joan behar da. Hobe da “Tonton…”
bidearekin hasi arrokari eta eskalada motari trukua hartzeko eta ondoren
“Babylon…” egitea.
Bilgune denak erosoak dira erlaitz handietan egiten
direlako. Prestatuta daude bidea rapelatzeko, baina hobe da oinez jaistea
(ezker aldetik). Bideak oso etzanak izan arren gustura geratzen zara eta gomendagarriak
dira.
Bideen oinarria nahiko altuera garaian dagoenez
(2.100 m ingurura) bideak udarako egun bero horietarako aproposak dira. Beraien
orientazioa (iparra) eta altueragatik ia beti brisa fresko bat dabil eta beraz,
komenigarria da babesteko arropa eramatea.
Iristeko:
Gedre
herrira hurbildu eta bertatik Troumouse zirku aldera igo. Udaran zirkura
sarbidea kontrolatzeko ordainlekua dago. Egun osorako prezioa 5 euro dira (abuztua
2014), baina goiz ibilita ez da inor egoten ordainlekuan.
Hesia
zeharkatu ondoren errepidetik igo eta Maillet-eko aterpe-tabernara iritsiko
gara. Errepideari jarraituz, plakak bere eskuin aldean geratzen dira, ur-jauzi
baten gainean. Kotxearekin errepidetik igo eta plaketatik gertuen dagoen
bihurgunean aparkatu.
Hurbiltzeko: Ikus hurrengo sarrera.
 |
| Dalle du Maillet. |
Tonton
coinceurs (5b, 225 m, derrigorrez 4c)
L1
(45 m, 7 aseguru, 4a). Organo hodiz osatutako hormatxo-sabela
hasieran. Gero, erlaitz handi batera iritsi arte, plaka asko etzaten da. Azken
zatian itsasgarritasun pasagunetxoak dituen plaka etzan batez osatua dago.
L2
(55 m, 11 aseguru, 5b). Hasierako metroetan horma-sabela (aseguruak gertu).
Ondoren aseguruak urrutirago dituen plaka etzana. Azken aldera ezker aldera jo
behar da erlaitz belartsu handi batean dagoen bilgunea aurkitzeko.
L3
(15 m, 3 aseguru, 4b). Ongi babestuta dagoen horma txiki bertikal
bat gainditzeko balio duen luze laburra. Bilgunetik irteteko pasagunetxo bat
dago. Horma gainditu ondoren, erlaitz
belartsu handi batera irtengo gara. Bertan aurkituko dugu bilgunea.
L4
(55 m, 11 aseguru, 5a). Plaka luze bat hasieran. Beste plakatxo
batera igarotzeko erresalte txiki bat gainditu behar da. Plakatxoa igarota
luzea asko etzaten da. Bilgunea aurkitzeko ezker aldera igo behar da.
L5
(45 m, 8 aseguru, 3b). “Lau hanketan” igotzen den plaka oso etzana
itsasgarritasunezko pasagunetxoren batekin.
Materiala: 11 zinta + bilgunerako
materiala. Friendsak eta fisureroak ez dira beharrezkoak.
Arroka: Kareharria.
Orientazioa:
Iparra.
Iraupena: 1h15min.
Nork ekipatua: Zonzibar eta
Yaks, 2011.
Babylon
by bus (5c, 210 m, derrigorrez 5b)
L1
(55 m, 4 aseguru, 4b). Organo hodiak dituen hormatxo etzan bat
hasieran. Ondoren aseguruak oso urruti dituen plaka oso etzanak.
L2
(55 m, 6 aseguru, 5a). Organo hodiz osatutako plaka hasieran.
Ondoren itsasgarritasunezko pasaguneak dituen plaka etzan nahiko leuna. Oin eta
eskuentzat beti aurkituko ditugu pitzaduratxo eta erregletatxo txikiak. Plaka
hobeto igotzen da bere ezker aldetik pitzadura txiki baten laguntzaz baliatuta.
L3
(45 m, 6 aseguru, 5c). Gertu dauden bi aseguruz babestutako pasagune
fin bat duen plaka bertikal motza.
Pasagunea A0 modura igo daiteke. Erlaitz belartsu batera irtengo gara eta
bertatik nahiko mantendua den itsasgarritasunezko plaka leun etzan bati ekin
behar zaio. Pasagune fin batzuk ditu eta aseguruak urruti daude. Luzeko lehe
asegurua 6-7 metro ingurura dago (zati bertikala, baina nahiko erraza lehenengo
asegurura iritsi arte).
L4
(45 m, 6 aseguru, 4b). Bilgunetik irteteko sabaitxo bat (luzeko
pasagune gogorrena). Ondoren organo hodiz osatutako plakatxo bat. Jarraian
erlaitz belartsu handi batez banandutako plaka etzanak. Bilgunea aurkitzeko bosgarren
asegurutik aurrera ezker aldera jo behar da.
L5
(20 m, 1 aseguru, 3a). Oso etzana den plakatxoa. “Lau hanketan”
igotzen da.
Jaitsiera:
Bi bideentzat berdina. Belarditik igo eta, aukera dugunean,
ezker aldera jo. Erreka zeharkatu eta beste aldean dagoen bidezidorretik
jaitsi. 15 minututan bideen oinarrian gara.
Materiala: 6 zinta + bilgunerako
materiala. Friendsak eta fisureroak ez dira beharrezkoak.
Arroka: Kareharria.
Orientazioa:
Iparra.
Iraupena: 1h15min.
Nork ekipatua: Zonzibar,
Yaks eta Luigi, 2011.
0 comentarios:
Publicar un comentario