Els Ports - Cheburashka (4c, 240 m, derrigorrez 4c)

Orokorrean plaka etzanetatik doan bide polita. Aseguruak urruti. Lehenengo bi luzeetan aseguruak aurkitzean dago “zailtasuna”, urruti daudelako eta arrokarekin oso ongi mimetizatzen direlako.

Giltza laugarren luzeko hasiera da. Aseguruak urruti dituen plaka bertikala da. Gainera ez dago aseguruen artean zerbait ipintzeko aukerarik.

Iristeko: Ikusi hurrengo sarrera (Els Ports).

Hurbiltzeko: Lliberós aparkalekutik Els Estrets-eko bidea hartu eta 20 minututan Gronsa Sud-eko mendebaldeko hormaren oinarrian gara. Materiala jantzi eta bidearen hasierara oinez igo (beste 5 min. inguru). Bidearen hasiera aurkitzeko harlauza bereizgarri batean ohartu behar gara. Bere azpian, ezkerretara, 3 metro ingurura, dago R0 bilgunea. Kubetatxo moduko batean dago.

L1 (30 m, 4 aseguru, 3c). Plaka etzan erraza, baina aseguruak urruti. “Zailtasuna” hurrengo asegurua aurkitzea da. Bigarren asegururaino gorantz emeki egiten duen diagonala eginez igo eta ondoren dena zuzen. Bilgunea harri baten gainean aurkituko dugu.

L2 (40 m, 3 aseguru, 3c). Plaka etzanetatik kanalaren ezkerrean geratzen den zehaztugabeko espoloira irten arte zuzen igo. Bilgunea kanala amaitu eta metro batzuk gorago, eskuinean, aurkituko dugu. Azken 10-15 metroak errazak, baina asegururik gabe.

L3 (60 m, 0 aseguru, 3a). Gure gainean ikusiko dugun ipuru aldera zuzen igo. Ipuruan zintaren bat ipintzeko aukera dago. Apur gorago eskuinera egin eta plaka handi aldera zuzen igo (eskuineko pitzaduraren batean friend ertainen bat jartzeko aukera dago). Hartxintxar solte ugari dago luzean. Bilgunea parabolt bakar batez osatua.

L4 (50 m, 5 aseguru, 4c). Lehenengo asegurua 8 metro ingurura. Luzearen hasiera 20 metro inguruko plaka bertikala da. Aseguruak urruti ditu eta beraien artean ez dago ezer ipintzeko aukerarik. Ondoren plaka etzan egiten da eta erlaxatuago igotzen da.

L5 (35 m, 3 aseguru, 4b). Bilgunetik atera eta berehala erresalte bat. Ondoren, azken plaka bertikalaren oinarrira iritsi arte, plaka etzana. Azken plaka bertikalak 10-15 metro ditu eta arroka eta euste-leku onak ditu.

L6 (25 m, 1 aseguru, 4a). Ezker aldera 10 metro horizontalean egin behar dira (ia oinez egiten dira). Atzean aurkituko dugun kanala zeharkatu eta justu aurrean luzean dagoen aseguru finko bakarra aurkituko dugu. Apur bat aurrerago ipuru batek azken metroak babestea ahalbidetzen du. Ezkerrera metro pare bat eginez, ertzera irten. Bertan gaudenean bilgunea ikusiko dugu (lehenago ez da ikusten).

Jaitsiera: Oinez. Gronsa Sud-eko gailurra bere oinarritik inguratu oso nabaria den lepo batera iritsi arte. Bertatik, mendebaldera, jaisteko bidezidorraren arrastoak ikusten dira. Arantzadun zuhaixkaren bat edo izan ezik, Gronsa Sud gailurra inguratzeko ez dago aipatzeko zailtasunik. Lepotik mendebaldera jaitsi. Bidea aldapatsua da, baina arazorik gabe jaisten da. Jaitsieraren erdi aldera soka finko bat aurkituko dugu. Plaka etzan bat jaisten laguntzeko jarria dago. Errekara iristerakoan bidea adierazten duen mugarri bat aurkituko dugu. Erreka jauzi batera iristen denean, ezkerrean dauden mugarriei jarraitu. Bigarren jauzira iristerakoan, erreka Els Estrets aldera irekitzen denean, eskuin aldera erlaitz batzuetatik diagonalean jaitsi. Bidera iristeko 35 minutu inguru kalkulatu. Denbora horri kotxera itzultzeko beste 20-30  min. inguru gehitu behar zaizkio.

Materiala: 5-6 zinta + bilgunerako materiala. Bi edo hiru friend ertain eta ipuruetan jartzeko zinta luze pare bat.

Arroka: Kareharria (konglomeratua).

Orientazioa: Mendebaldea. Goizez itzala.

Iraupena: 2h.

1. igoera: Dragos Slanina, Boris Coll, Rodri Parra eta Jordi Mena, 2011.

Cambiar idioma (Castellano)