Masmutera hurbildu ginen egunean oso egun hodeitsua
suertatzen zen. Horrez gain, 2 ºC-ko tenperatura “goxo” bat egiten zuen eta
haize pixka bat zebilen. Ez zen giroa eskalatzekoa, baina euskaldunak garenez
aurrera jarraitu eta horman sartzea erabaki genuen. Arropa apur batekin dena
konpontzen da. Aurreko egunean euria egin zuen eta arroka oraindik ez zegoen
guztiz lehorra.
“Els Pedregals” eta “Canchas para todos” izeneko
bideak egiten genituen. Bietatik, gehien gustatu zaiguna (eskalada motagatik,
arrokagatik eta ekipazioagatik) “Els Pedregals” izan da. Aipamen batzuetan
“Canchas para todos” bidea Masmuteko bide errazena dela diote. Egia da ez dela
oso zaila eta nahiko ongi ekipatuta dagoela, baina eskalada bitxia dauka.
Diedro-tximinia moduan eskalatzen da ia bide osoan eta kanala osatzen duen
eskuineko horma nahiko higatuta dago uragatik. Guri zertxobait arraroa egin
zitzaigun (nahiko “arrastaka” ibili ginen).
OHARRAK: Herrian dagoen “Sociedad” tabernan inguru hauetako aipamen eta krokisak
aurki daitezke (zerbitzariari galdetu).
Tabernan aurkitu genituen aipamenetan “Els
Pedregals” ireki zutenek (Luis Royo eta Julio Benedé bikote ekipatzaile
ezagunak) bidea 2007ko azaroaren 4ean ekipatzen hasi zirela diote (broka apurtu
egin zitzaienez, ez zuten amaitu). Noiz amaitu zuten ez da aipatzen (edo guk ez
genuen aurkitu). Hori dela eta hilabete hori jarri dugu bidearen irekiera-data
modura.
“Els Pedregals” bidearen eskuinean paraboltekin
ekipatutako 3 bide daude (oso ongi ekipatuak). Horietako batek, “Els
Pedregals”-etik hurbilen dagoenak, luze ugari dituela eta aurrekoarekin R3
bilgunean elkartzen dela dirudi. “Els Pedregals” bidearen antzekoa ematen du,
baina zertxobait bertikalagoa. Ez ginen sartu egitera hotzagatik. Norbaitek
badaki bidearen izena eta zailtasuna? Informazio hori eskertuko nuke.
Iristeko: Peñarroya de Tastavins herrira hurbildu. Herriko sarreran, Tastavins
hotelaren aurrean, “peñas de Masmut” kartelarekin adierazita dagoen zementuzko pista
hartu. Pista horri jarraitu behar zaio 3 km inguru (eskema ikusi). Lehenengo
herena zementuz osatuta dago. Gero, zati labur batzuk izan ezik, egoera onean
dagoen lurrezko pista bat da. Aparkalekuan 4-5 kotxentzat tokia dago.
Hurbiltzeko: Aparkalekutik, gure ezkerrera, hormak ikusiko ditugu. Gure aurrean PR-TE
157 Arroyo Los Prados ibilbideko bidea (beherantz egiten du) jaiotzen da. Bide
hori hasten den tokian, zertxobait ezkerrera, hain nabaria ez den beste bide
bat adierazten duen mugarria ikusiko dugu. Bide horrek inguru hauetako bide
klasikoetara (Aresta GAS…etab) hurbilduko gaitu.
“Els Pedregals” bidea dagoen ezproira hurbildu nahi
badugu, onena ipar aldera jotzen duen bidetik 30 metro inguru igotzea da.
Pinuditik irtetean edo irten baino zertxobait lehenago, eskuinean, hormara
hurbiltzeko bidea adierazten duten mugarriak ikusiko ditugu. Horiei jarraitu
eta aparkalekutik 4 minututan bideen oinarrian gara.
Els
Pedregals (4c, 90 m, derrigorrez 4b)
Bidea ireki zutenek aipatzen dutenez “Bidearen izena ibilbidean erabiliko ditugun
uharri marroiengatik da”. Gozatzeko bidea.
L1
(30 m, 9 aseguru, 4c). Euste leku oneko plaka hasieran (lehenengo
bi herenetan). Azken herena itsasgarritasunezkoa eta euste leku txikiekin.
L2
(25 m, 6 aseguru, 4c). Uharri potoloak dituen pitzadura-kanala
hasieran. Gero, euste leku txikiko plaka. Azken metroak oso etzanak. Bilgunea
zulo nabari batean.
L3
(15 m, 4 aseguru, 4c). Arroka oso trinko
eta oneko luzea. Sabai-sabela behetik ematen duena baino errazagoa da. Oso ongi
babestuta dago (A0 modura ere egiteko prestatuta dago). Sabela gainditu ondoren
eta bilgunera iritsi arte, zati erraza. Bilgunea plataforma handi batean egiten
da. L2 eta L3 luzeak elkartzeko aukera dago, baina orduan bikotearen arteko
komunikazioa ez litzateke hain ona izango. Plataformatik ezkerrera eginez bidea
uzteko aukera dago.
L4
(20 m, 4 aseguru, 4b). Horma motz bat hasieran, gero errazagoa.
Uharri handiak (bateren batekin arreta izan; gehienbat arroka bustia badago).
Bilgunea ipuru batean egiten da (bloke batean zinta bat ipiniz indartu
daiteke).
Jaitsiera:
Azken bilgunetik ezkerrera jaitsi. Ageriko
jaitsiera. 5 minututan berriro gara kotxean edo bidearen oinean.
Materiala: 9 zinta +
bilgunerako materiala. Friendsak eta fisureroak ez dira beharrezkoak.
Arroka: Kareharria
(konglomeratua)
Orientazioa:
Hegoa.
Iraupena: 1h.
Nork ekipatua: Luis Royo
eta Julio Benedé, 2007ko azaroa.
Canchas para todos (4c, 85 m, derrigorrez 4c)
Arroka-zubietan altzairuzko eraztunez eta paraboltez
ekipatutako bidea. Arroka-zubiren bateko eraztuna kanaletik urak jaisten duen
zikinkeriagatik erdi ezkutatuta dago. Behetik gora begiratuta, kanalaren eskuin
aldeko arroka nahiko higatuta dago uragatik eta nahiko irristakorra da. Bidea
zertxobait zikina aurki dezakegu, baina ez molestatzeko haina. “Sociedad”
tabernan aurkitu genuen aipamenean “Masmuteko
ekipatutako bide errazena. Aragoiko hainbat eskalatzaileek ireki zuten
eskalatzen hasten zirenek erabiltzeko eta disfrutatzeko asmoarekin” jartzen
zuen.
L1
(25 m, 4 aseguru, 4a). Arroka labainkorra duten bi plaka erlaitz
txiki batez bananduak. Bilgunea bloke handian aurkituko dugun altzairuzko
eraztunean egiten da.
L2
(25 m, 4 aseguru, 4c). Estutu behar den plaka bertikala. Trukua
diedrotik irtetea da, baina gorputzak barruan sartzea eskatzen du. Bilgunea 2
paraboltez osatuta, eskuinean.
L3
(20 m, 3 aseguru, 3c). Lehenengo metroak kanalaren ezkerrean
geratzen den plaka etzanetik egiten dira. Bilgunea parabolt batez osatua.
L4
(15 m, 1 aseguru, 4c). Landatutako bloke handira iritsi arte ia
horizontala den kanala. Blokeko pasagunea, ziala baino deserosoa da. Ongi
babestuta dago blokean estrategikoki ipinita dagoen parabolt batekin. Nahi
baldin bada aurkituko dugun zuhaixka batekin lagundu gaitezke pasagunea
emateko. Zuhaixka hori justu bloke handiaren azpian dago. Bilgunea blokea
gainditu eta metro batzuk gorago ezkerreko horman aurkituko dugun parabolt
batean. L3 eta L4 luzeak elkartzeko aukera dago.
Jaitsiera:
Azken bilgunetik arreta apur batekin, oinez, gora
igo. Hortik mugarriak jarraitzea soilik geratzen da jaitsiera aurkitzeko
(destrepe txikiren bat dauka). Kotxera edo bideen oinarrira itzultzeko 10 min
inguru beharko ditugu.
Materiala: 4-5 zinta +
bilgunerako materiala. Friends edo fisurero handiren bat ongi etor daiteke
(gehien bat L2 luzerako).
Arroka: Kareharria
(konglomeratua)
Orientazioa:
Hegoa.
Iraupena: 1h.
0 comentarios:
Publicar un comentario