© X. Larretxea. Con la tecnología de Blogger.

2022/09/23

Bide ederra. Arroka eta ekipamendua oso onak. Jarraitzeko gogoarekin geratzen zara. Inguruan beste bide bat egin ondoren eguna osatzeko bide aproposa izan daiteke. Baita ingurutan ibilita denborarekin justu bagabiltza ere bide aproposa izan daiteke, azkar egiten baita. Bideak “postontzilandia” den arroka mota erakusten du hainbat tokitan. Zailtasunean nahiko homogeneoa da, 4b/4c inguruan ibili daiteke, baina baditu luzeei zailtasuna ematen dieten pasagunetxo batzuk.  Bilguneak toki erosoetan, katez lotutako bi paraboltez osatuak.

 

Iristeko eta hurbiltzeko: Ikus hurrengo sarrera.

 

L1 (35 m, 8 aseguru, 5a). Eskuinera eginez diagonalean igotzen den plaka zimurtua hasieran. Txapen eskuinetik “postontzilandia”. Ondoren postontzi ugari agertzen dituen plaka bertikala. Aseguruen eskuinetik hobeto igotzen da. Azken asegurutik ezker aldera jo behar da. Hemendik bilguneraino asegururik gabe 10 m inguru egin behar dira, baina oso zati etzana eta erraza da. Zintak eramaten baditugu zati horretan dauden ezpeletan zintaren bat jar daiteke.

L2 (30 m, 10 aseguru, 5a). Ezker aldera irten. Txapen eskuinean pitzadura bat ikusiko dugu. Tentagarria da, baina hobe da plakatik igotzea (aseguruen ezkerretik) pitzadura itsua baita eta oso euste leku gutxi ditu. Ondoren plakatik ezker eskubira eta eskunetik ezkerrera mugitzen ibili behar da agerikoena dena bilatzeko. Bi pasagunetxo daude non zertxobait gehiago estutu behar den. Lehenengoa zazpigarren aseguruaren inguruan eta bigarrena azken aseguruan.

 


                                            

Jaitsiera: Bilgunetik bi metro eskuinera eraztun bat duen kimiko bat dago eta zertxobait aurrerago erresalte txiki bat igotzeko ferratetako grapa bat. Hori gainditu ondoren, “K” eta “Tardor Calenta” bideak amaitzen diren ingurura igoko gara. Bertatik, bidezidorrari jarraituz, bidezidor nagusira jaitsi (5 min) eta kable eta grapak dauden tokitik jaitsi. Kotxera itzultzeko 15 min inguru beharko ditugu.

 

Materiala: 10 zinta + bilgunerako materiala. Friendsak eta fisureroak ez dira beharrezkoak, baina beraiekin “jolastu” nahi baldin badugu, harkaitzak aukera handiak ematen ditu pitzadura eta zulo ugari baititu.

Arroka: Kalitatezko kareharri grisa.

Orientazioa: Hegoa.

Iraupena: 45min

Nork irekia: Santi Sanz, 2019ko amaiera aldera.

 

Cambiar idioma (Castellano)

 





Categories: , ,


Komentariorik egin nahi baduzu,hau da lekua.

0 comentarios:

Publicar un comentario