Els Ports - Caspa i càries (5b, 305 m, derrigorrez 5a) ~ Eskalatzen

2014/05/09

Els Ports - Caspa i càries (5b, 305 m, derrigorrez 5a)

Egilea X Larretxea Ordua 14:24 Komentariorik ez

Bi zati oso desberdinak dituen bide luze polita. Lehenengo lau luzeetan plaka etzanetan eskalatzen da eta zailtasunak oso noizbehinkakoak dira. Beste lau luzeetan zailtasuna mantendua duten plaka bertikalagoetan eskalatzen da. Azken luzean bosgarren mailako pasagunea gilbortxo bat gainditzea da. Pasagune bakarra da eta A0 modura egin daiteke. Aseguruak metal kolorekoak direnez oso ongi kamuflatzen dira arrokarekin. Lehenengo luzeetan, batzuetan, zailtasuna hurrengo asegurua non dagoen aurkitzea izaten da.

Iristeko: Hurrengo sarrera ikusi (Els Ports).

Hurbiltzeko: Lliberós aparkalekutik Els Estrets-eko bidea hartu. Gronsa Sud hormaren oinarrian 20 minututan gara. Materiala jantzi eta oinez bidearen hasierara igo. Hasiera aurkitzeko kontuan izan bidea horma laranja handiaren eskuin aldean dagoen plakaren oinarrian hasten dela. Hasierako R0 bilgunea paretatik hiru metro inguruko distantziara aurkituko dugu.

Bidearen hasiera aurkitzeko erreferentziak.

L1 (40 m, 4 aseguru 3b). Plakara igotzeko hormatxo bat hasieran. Ondoren itsasgarritasun handiko arroka duen plaka etzana.

L2 (45 m, 5 aseguru 3b). Aurreko luzearen antzera, plaka etzana.

L3 (30 m, 4 aseguru 4b). Bilgunetik irteteko ongi babestutako hormatxo bertikal bat (2 aseguru). Ondoren plaka etzan batetik, gorantz, ezkerrera, emeki jotzen duen zeharkaldia egin behar da.

L4 (45 m, 6 aseguru 4c). Lehenengo asegururaino zuzen igo. Ondoren diagonal bat eginez ezker aldera igo. Diagonalaren erdi aldera pasagune fin bat. Bosgarren aseguruan ezkerrera zeharkaldi horizontala egin eta seigarren asegurura iristerakoan metro bat inguru jaitsi. Lurreko erlaitz batek (10-15 m) bilgunera hurbilduko gaitu.

L5 (45 m, 9 aseguru 5a). Arroka trinkoz osatutako plaka bertikala. Zailtasuna mantendua duen luzea da. Zazpigarren asegurutik aurrera plaka zertxobait etzaten da.

L6 (40 m, 8 aseguru 5a). Hormatxo batetaraino iritsi arte, plaka etzana hasieran. Hormatxoa gainditzeko hobeto da ezkerretik ekitea. Ondoren plaka bertikala,baina igotzen garen heinean, apurka, etzaten doa. Amaiera aldera, bilgunea aurkitzeko, nahiko ezkerrera jo behar da. Behetik nabari den erlaitz handiaren eskuin erpinean dago.

L7 (20 m, 4 aseguru 4c). Luze laburra. Euste leku txikiak dituen plaka bertikala.

L8 (40 m, 6 aseguru 5b). Plakan ipini arte, horizontalean, eskuin aldera irten. Luzeko pasagune gogorra hirugarren aseguruan dago. Gilbortxo bat gainditu behar da. Ongi babestua dago eta gainera, behar izanez gero, A0 modura igaro daiteke. Ondoren, bilgunera iritsi arte, plaka etzaten doa.

Azken bilgunetik gailurrera plaka oso etzan batetik igotzen da (II).