Antxon Gorrotxategiren eta bere lagunen azken bide
semiekipatua. Bidearen izena L1eko amaieran dagoen basotxotik dator. Zati hori
garbitzea eta bidea irekitzea asko kostatu zaie. Basotxo ere Iturrimurri
ezproia baino zertxobait urrutirago dagoen kobazulo motz eta polit baten izena
da (Imanol Errazkin eta Sabino Orbegozok eginiko “Zulotoa” liburuan agertzen
da).
Bidea “Egino modukoa” da, basotxo pare batekin eta
harriarekin arreta izan behar den hainbat zatirekin. Bidearen beste arroka
guztia gozatzekoa da. Bidea paraboltekin eta arroka-zubiekin ekipatuta dago,
baina hainbat lekutan autobabestu beharra dago. L2, L5 eta L4 luzeak izan dira
guretzat, eta orden horretan, luze politenak. L2ko bigarren zatian “Berto
pitzadura” aurkituko dugu. Helduleku onak ditu lehen zatian, baina amaieran
pasagune fin pare bat ditu. L4ko bigarren zatia “Udaberri” bidearekin komuna da
eta nahi bada bi zatitan bana daiteke “Udaberri” bideko R4 bilgunea aurkituko
dugu eta. L5eko luzeak helduleku oneko pitzadura bertikal luze bat du, baina
autobabestu beharrekoa da.
Iristeko eta hurbiltzeko: Ikus hurrengo sarrera.
L1 (45 m, 6 aseguru, 4a). Arroka hautsia eta ahula duen luzea. Plakatxoa hasiera eta ondoren
(zertxobait eskuin aldera eginez) harkaitzarekin arreta izan behar den eta
autobabestu behar den zati luzea.Ondoren zati bertikal motz bat (arrokarekin
arreta izaten jarraitu behar da), baina bigarren paraboltatik aurrera gauza
asko hobetzen da. Antxonek dion bezala zatia garbitzen eta hobetzen lan handia
hartu dute, baina ezin izan dute parabolt gehiago jarri arrokak ez baitzuen
uzten. Hala ere, zati horretan friends edo fisureroren bat jarri daiteke.
Antxonen aipamenean luze honi 3c zailtasuna ematen dio, baina guri zailagoa
iruditu zaigu (agian psikologikoa izan daiteke).
L2 (40 m, 14 aseguru, 5c). Arroka oneko luze bertikala. Zailtasuna mantendua du, baina “Berto
pitzaduren” irteerak estutu beharreko pare bat pasagune fin ditu. Lehenengo
asegurua ipintzeko ezkerrean dagoen kalanaz lagundu gaitezke. Bigarren asegurua
jarri ondoren hobe da eskuinera pasatzea.
L3 (45 m, 9 aseguru, 4c). Ezkerrera egiten den zeharkaldi horizontal motz batek plakatxo baten oinarrian
jartzen gaitu. Plakaren gainean terrazatxo lurkara bat eta ondoren hasieran
ur-tantak dituen plaka. Plaka horren amaieran luzeari zailtasuna ematen dion
zatitxo bat dago. Geratzen den zatiak helduleku pilo bat ditu.
L4 (45 m, 12 aseguru, 5a). Plakako pasagunetxo bat hasieran 2
paraboltez ongi babestua. Ondoren ezkerrera pasa (pasagunetxoa) eta harmailetatik
igo Udaberri bideko R4 bilgunea aurkitu arte. Luzea zatitu daiteke edo
eskalatzen jarraitu. Azken plaka geratzen da, azken zatian pasagune finen
batekin (sabai nabariaren azpian).
Hurrengo luzearen oinarrira igotzeko, oinez igotzen den
50-60 metroko zatia (bidearen izena plakatxo batean jarrita dago).
L5 (45 m, 9 aseguru, 5b). Plaka etzana hasieran. Ondoren eta lehenengo paraboltera iristeko
itsasgarritasunezko plaka etzana. Ez da zaila, baina oinetan fidatzea
beharrezkoa da. Jarraian erdian pitzadura bat duen eta autobabesen bat jarri
behar den plaka bertikala. Irteeran ur-tantez osatutako plaka batek sabai baten
azpian uzten gaitu. Eskuinetik ekiten badiogu hasieran ematen duena baino
errazagoa da helduleku onak dituelako. Sabaia gainditzean plaka bat gainditu
behar da bilgunera iristeko (oso ezkerrean geratzen da).
L6 (35 m, 4 aseguru, 4b). Lehenengo parabolta zertxobait altua duen plaka hasieran. Ondoren plaka
labur batzuen segida. Aseguru finkoen artean (zertxobait urruti daude)
autobabesak ipintzeko aukera dago. Bilgunea aurkitzeko erreferentzia bezala “Y”
forma duen zuhaitz hil bat hartu behar da.
Jaitsiera: Azken bilgunetik, bide egokienetik, goraino igo (mugarri batzuk badira).
Goian ezkerraldera jo eta Azor-eko bide arruntetik oinez jaitsi.Lurra
bustiarekin kontuz ibiltzeko jaitsiera da. Kotxeraino guztira 50-60 min inguru.
Jaitsieraren krokisa hemen uzten dizuet.
Materiala: 14 zinta + bilgunerako
materiala. Friends eta fisurero joko bana eta zinta batzuk.
Arroka: Kareharria
Orientazioa:Hegoa
Iraupena: 3h.
Nork ekipatua: Antxon Gorrotxategi eta laguntzaileak: Javier Barbarin “Olaf”, Gerardo
Bilbao, Susana Agirre “Susi”, Belen Eguskiza eta Iñaki Gorrotxategi “Joe
Marmota”, 2018.
0 comentarios:
Publicar un comentario