Cambrils - Via del Castell (5c, 60 m, derrigorrez 5a/A0) ~ Eskalatzen

Uda honetan Katalunian ibili gara eta beroak gogor jotzen zuenez, itzalaren bila edo laster esnatuz ibili gara.

Bidea laburra da, baina udako arratsalde baterako aukera ona izan daiteke, orientazioagatik itzala ematen baitio. Lehenengo rapelatu eta gero eskalatu behar denez, guztira jarduera polit bat suertatzen da.

Bigarren luzeko plaka, ederra. Plaka horrengatik bakarrik merezi du bidea egitea.

Badira beste bide batzuk (erdi hornituak) Castell bidearen ezkerraldean eta eskuinaldean.

Leku lasaia eta historiarekin. Bortoloko gaztelua jaun tenplarioen eskutan egon zen aldi batez. XIII. mendean jabetza Peramolako jaunarena zen eta XIV. mendearen amaieran Cardonako bizkondearen eskuetara igaro zen. Gazteluak Olianatik Cambrilserako bide tradizionala kontrolatzen zuen.

Iristeko: Cambrils (Lleida) herrira hurbildu. LV-4011 errepidea hartu Solsona aldera. Gazteluaren hondakinak aurrean ditugula, eskuinetara bihurgune handi bat egin aurretik, eskuinetara auto batzuk uzteko lekua dago (hilerritik gertu). Beste aukera bat errepidean gora jarraitzea da, eta gandorrera iritsi baino 50 m lehenago (errepideak bihurgune txiki bat egiten duen leku batean) autoa errepidearen ezkerreko aldean aparkatzea da (belardi aldean). Adi, auto bakarrarentzako lekua (gehienez 2). Leku ona da, autoa errepidetik kanpo geratzen baita, eta goitik datozenek eta behetik datozenek ikusteko moduan geratzen delako.

Nacho Sánchezek iradokitzen duen hurbilketarako (uste dut erosoagoa dela) hilerri alboan aparkatzea hobe.

Hurbiltzeko: 50 m errepidetik jarraitu Solsona norabidean, zutabe adierazle batera iritsi arte. GR markak zuri-gorriak ikusiko ditugu. GR bidea hartu eta Cambrils aldera jaisten hasi. Bideari jarraitu zurezko zutabe elektriko bat (zahar horietako bat) ikusi arte. Hamar metro lehenago bidea jaitsi mugarri bat ikusiko dugu. Bidea utzi eta bidezidor arrastoetatik lepokoraino igo.

Lepotik behera eta ezkerrera egin apur bat (mugarriak). Airetiko pasagune labur bat igaro ondoren, bilera gure ezkerretara dago, sabai nabarmen baten azpian.

Nacho Sánchezek ematen duen informazioaren arabera, gaztelutik jaisteko bide bat omen dago. Bide horretatik 10 minututan bidearen hasieran omen zaude.

Jaitsiera: Bi parabolt dituen rapel instalazioa, baina malloi bakarrarekin. Ekipazioa beste malloi batekin edo mosketoi batekin osatu behar da (gero errekuperatu egiten da). 60 metroko bi sokekin 50 metro inguruko rapel bakar batean jaitsi daiteke, baina soken berreskurapena oso neketsua da (soken marruskadura handia). Beste aukera bat jaitsiera bi rapeletan zatitzea da. R1 plataforma zabal eta eroso batean dago. Bi parabolt dira (uztairik eta mailoirik gabe). Agian denbora zertxobait gehiago beharko da, baina garbiagoa da eta ez hain neketsua. Beste 2 malloi edo mosketoi aurreikusi, bigarren aukera hori aukeratzen badugu.

Gaztelutik jaitsita ez da behar rapelatzea. Hurbilketa hori aukeratzen badugu kotxera itzultzeko lehenik lepotxora igo behar da eta bertatik, bidezidor arrastoei jarraituz GRra jaitsi behar da. GRari behe aldera j

L1 (30 m, 7 aseguru, 5c). Lehen 5 aseguruko tartean horma bertikala (S handi bat egiten igotzen da). Pasagune finak hasieran eta 4. eta 5. aseguruen artean.

Bideak bi ipuruen artean hasten da. Ezkerrekoan zinta bat jarri daiteke, baina errazagoa da eskuineko ipurua dagoen tokitik igotzea. Zati bertikala gainditu ondoren bideak jarraitzen du toki batetik non ematen duen arrokak euste leku onak izango dituela, baina ez ditu hainbeste. Zati horrek goitik erortzen den lur pixka bat dauka. Lehen luzeko azken metroak oso politak dira. Zati horretan arrokak biribildutako euste leku oso onak eta bitxiak ditu.

L2 (30 m, 6 aseguru, 5b). Bilgunetik irteteko pasagunetxo bat (zertxobait luzatuz A0 moduan egin daiteke). Euste leku on pare bat badaude, baina horietako bat zertxobait izkutatuta. Ondoren arroka trinkoz osatutako plaka eder bat, euste leku ugariekin. Bigarren luze honetako arroak Carrascal-ekoa (Nafarroa) gogorarazi zidan. Gogoarekin geratzen zara. Horrelako beste 2 edo 3 luze gehiagoren nahiarekin geratzen zara.